ԵՐԵՎԱՆ, 29 հուլիսի-Sputnik. Sputnik Արմենիայի հետ զրույցում արձագանքելով Արամ Մանուկյանի փաստաբան Ինեսա Պետրոսյանի բողոքին, ՀՀ ԱՆ Քրեակատարողական ծառայության Հանրային կապերի բաժնի պետ Գոռ Ղլեչյանը հայտնեց, որ Արամ Մանուկյանն ապահովված է անհրաժեշտ բժշկական օգնության միջոցներով, իսկ հիվանդասենյակի սանիտարահիգիենիկ պայմանները բավարար են:
Գոռ Ղլեչյանի խոսքով, Ա.Մանուկյանը ստանում է հիվանդ դատապարտյալների և կալանավորված անձանց համար օրենսդրությամբ նախատեսված և սահմանված սնունդ:
Պատասխանելով քրեակատարողական հիմնարկների սանիտարահիգիենիկ վիճակի մասին տարաբնույթ մեկնաբանություններին քրեակատարողական վարչությունը նաև հայտնում է, որ ապրիլի 19-ին«Երևանի կանխարգելիչ ախտահանում» ՓԲԸ-ի հետ կնքված պայմանագրով ՀՀ ԱՆ բոլոր քրեակատարողական հիմնարկներում շարունակաբար իրականացվում են սանիտարահիգիենիկ և հակահամաճարակային վիճակի բարելավմանն ուղղված աշխատանքներ:
Ծառայությունը հայտարարում է, որ ՔԿ հիմնարկների բուժմասերի, բնակելի գոտիների, սանհանգույցների և խոհանոցների ախտահանման և մակաբույծների ոչնչացման աշխատանքները կատարվում են յուրաքանչյուր շաբաթվա երեքշաբթի օրը:
Հիշեցնենք, «Սասնա ծռեր» խմբավորման անդամ Պավել Մանուկյանի որդու՝ Արամ Մանուկյանի պաշտպան Ինեսա Պետրոսյանը պահանջում էր նրան «Դատապարտյալների հիվանդանոց» ՔԿՀ-ից տեղափոխել քաղաքային հիվանդանոց՝ հայտարարելով, որ իր պաշտպանյալը պահվում է անմարդկային և նվաստացուցիչ պայմաններում և կարող է այրան վարակ ստանալ:
«Սենյակում ի սպառ բացակայում են սանիտարահիգիենիկ պայմանները, պատերը ամբողջությամբ բորբոսնած են: Սենյակում իմ պաշտպանյալը միայնակ անօգնական պառկած էր և որևէ բուժաշխատող առկա չէր: Նոր վիրահատված և ծանր վիճակում գտնվող իմ պաշտպանյալի համար ապահովված չէր ոչ միայն տարրական հիվանդասենյակի պայմանները, այլ նաև սնունդը, քանի որ իմ պաշտպանյալի մոտ դրել էին ընդամենը մեկ կտոր սև հաց, պանիր և կարագ այն դեպքում, երբ հետվիրահատական շրջանում իմ պաշտպանյալին անհրաժեշտ է ապահովվել հատուկ սննդակարգով»,- ասել էր Ինեսա Պետրոսյանը:
ՄԻՊ գրասենյակից էլ տեղեկացանք, որ այսօր պաշտպանի աշխատակիցների այցի պահին Արամ Մանուկյանը տեղափոխվել էր կարանտինային բաժանմունք: Ինչպես հայտնել են այցելուներին այստեղ պահման պայմանները հիվանդախցերի պայմաններից զգալիորեն տարբերվում են:
«Մեր դիտարկմամբ, նոր բաժանմունքի պատերը եւ հատակը նորոգված են, խցերն առավել լուսավոր եւ մաքուր են, հագեցած են բժշկական մահճակալներով, բազկաթոռներով, սառնարանով»,- հայտնում են ՄԻՊ գրասենյակից:
