ԵՐԵՎԱՆ, 29 հուլիսի — Sputnik. «Իրատեսը» գրում է. «Այս օրերին, երբ երկրում խառնակ վիճակ է. մարդիկ էլ խիստ նյարդային, դժվար է մի լուսավոր բան գտնել։ Սակայն այն տեղեկությունը, որ մեզ փոխանցեցին, հույսի մի շող է։ Քիմիական հսկայի «Նաիրիտի» խնդիրները տարիներ շարունակ ձգվում են, կաուչուկի ամենախոշոր արտադրությունից ոչինչ չի մնացել։ Մի նախարարից մյուսին փոխանցվող խնդիրների փաթեթը ոչ մի դրական տեղաշարժ չի արձանագրում, լավագույն դեպքում աշխատակիցների տևական դժգոհությունից հետո մարվում է չվճարված աշխատավարձերի մի մասը։
Թվում էր` «Նաիրիտի» հարցը լուծում չունի, սակայն պարզվում է, որ այս հարցում կա էական տեղաշարժ։ Մեր տեղեկություններով մինչև տարեվերջ բավականին լուրջ ներդրումներ են արվելու գործարանում, և մեծ է հավանականությունը, որ այն գրեթե նախկին թափով կաշխատի։ Թե ովքեր են այս ամենի թիկունքում, առայժմ մեզ չհաջողվեց պարզել, բայց էականն այն է, որ նաիրիտցիները կրկին աշխատանք կունենան»։
ԽՍՀՄ-ի տարիներին «Նաիրիտը» քլորոպրենային կաուչուկի միակ արտադրողն էր տարածաշրջանում։ 2006թ.-ին «Նաիրիտի» բաժնետոմսերի 90 տոկոսը վաճառվեց Rhinoville Property կոնսորցիումին 40 մլն դոլարով, բաժնետոմսերի 10 տոկոսը պատկանում է Հայաստանի կառավարությանը։ 2010թ.-ի ապրիլից գործարանում արտադրությունը դադարեցվել է ֆինանսական խնդիրների պատճառով։
