ԵՐԵՎԱՆ, 27 հուլիսի-Sputnik. Մարդու իրավունքների պաշտպանի աշխատակազմը հայտարարություն է տարածել, որում անթույլատրելի է համարում առանց պատշաճ բացատրության և հիմքերի ներկայացման քաղաքացիներին բերման ենթարկելը:
Հայտարարությունում, մասնավորապես, ասվում է.
«Հիշեցնում ենք, որ ՀՀ Սահմանադրության համաձայն՝ անձնական ազատությունից զրկված յուրաքանչյուր ոք իրեն հասկանալի լեզվով անհապաղ պետք է տեղեկացվի ազատությունից զրկվելու պատճառների մասին: Սահմանադրության այս նորմը գործում է անմիջականորեն և ենթակա է անվերապահ կատարման»:
Օմբուդսմենի աշխատակազմը տեղեկացնում է, որ Մարդու իրավունքների պաշտպանի աշխատակազմ ստացված հաղորդումների և լրատվության միջոցների հրապարակումների հիման վրա ներկայում այցելություններ են կատարվում հավաքի վայր և Ոստիկանության համապատասխան ստորաբաժանումներ:
Պաշտպանի աշխատակազմը շարունակում է աշխատել շուրջօրյա ռեժիմով։
