ԵՐԵՎԱՆ, 26 հուլիսի-Sputnik. Եվրոպական միությունը պատրաստ է 54 միլիոն եվրո տրամադրել Հայաստանին, Վրաստանին, Թուրքիային, Մոլդովային, Ուկրաինային, Բուլղարիային, Հունաստանին ու Ռումինիային՝ Սևծովյան ավազանի երկրների անդրսահմանային համագործակցության 2014-2020 թթ. ծրագրի շրջանակներում:
Այդ մասին այսօր Երևանում անցկացվող Եվրոպական հարևանության և գործընկերության գործիքի ներքո իրականացվող ծրագրի մեկնարկին նվիրված սեմինարի բացմանը հայտարարեց Էկոնոմիկայի փոխնախարար Գարեգին Մելքնյանը:
Թե ութ երկրից որոն ավելի շատ գումար կստանա՝ կախված է ներկայացված ծրագրերից:
ՙՙՕրինակ, տուրիզմի ոլորտում կարող է ներկայացվել Հայստան-Վրաստան-Բուլղարիա ծրագրային առաջարկ, որտեղ կարող է ներառվել փորձի փոխանակման, համատեղ փաթեթների մշակման, կրթական ծրագրերի իրականացման, մասնագիտական կարողությունների բարելավման առաջարկ՚,- նշեց փոխնախարարը:
Յուրաքանչյուր ծրագրի արժեքը 300 հազարից մինչև 1,5 մլն եվրո է, ոլորտային սահմանափակումներ չկան, բայց կան պարտադիր պայմաններ՝ ներկայացվող ծրագրում պետք է ներառված լինի առնվազն 3 շահառու երկիր, որոնցից մեկը՝ Եվրոպական միության անդամ:
ՙԵրբ մենք քննարկում էինք ընդհանուր ծրագրի կարգավորման մոտեցումները, Ադրբեջանը հարց բարձրացրեց, որ հաշվի առնելով կոնֆլիկտը, պետք է որոշակի հատուկ նկատառումներ մտցվեն: Բավական երկար համատեղ քննարկումների արդյունքում Ադրբեջանն ընդհանրապես դուրս է մնացել ծրագրից՚,– ասաց Մելքոնյանը:
