ԵՐԵՎԱՆ, 26 հուլիսի-Sputnik. ՀՀ-ԵՄ շրջանակային համաձայնագրի շուրջ բանակցություններն ընթացքի մեջ են և մինչև տարեվերջ դեռևս երկու բանակցային շրջափուլ է նախատեսվում, այսօր հայտնեց Էկոնոմիկայի փոխնախարար Գարեգին Մելքոնյանը:
«Բանակցություններն, ընդհանուր առմամբ, բնական հունով առաջ են գնում, մենք այս տարվա ընթացքում մի քանի անգամ ունեցել ենք բանակցային շրջափուլեր և փոխադարձ այցելություններ են եղել ու վիդեոկոնֆերանսներ»,- ասաց նա։
Փոխնախարարի խոսքով, որևէ խնդրահարույց հարց այս պահի դրությամբ չկա: Առևտրի և ներդրումների բաժնին առնչվող դեռևս ոչ բոլոր տեքստերն են Եվրամիությունից տրամադրվել հայկական կողմին, իսկ ստացված բոլոր հատվածները դրվում են ներքին շրջանառության մեջ, որից հետո նոր միայն սկսվում են Եվրոպական կողմի հետ բանակցությունները:
«Որոշակի հատվածում մենք արդեն համաձայնություններ ունենք, շատ հատվածներ կան, որոնց քննարկումները շարունակվում են»,- ասաց Գարեգին Մելքոնյանը:
Թե երբ կավարտվեն բանակցությունները, էկոնոմիկայի փոխնախարարը հրաժարվեց նշել, հիշեցնելով, որ ժամանակին, երբ քննարկվում էր ԵՄ-ի հետ «Խորը, համապարփակ, ազատ առևտրի համաձայնագիրը», դարձյալ խուսափել է որևէ ժամկետ նշելուց:
Ասոցացման համաձայնագրի տապալումից հետո այս համաձայնագիրը հերթական քայլն է Հայաստան-Եվրամիություն համագործակցության տիրույթում:
ԵՄ-ն տարեկան 50 մլն եվրո է տրամադրում ՀՀ-ում իրականացվող առևտրային ու ներդրումային ծրագրերին և խոստանում է ավելացնել այդ աջակցությունը նոր համաձայնագրի վավերացումից հետո:
