ԵՐԵՎԱՆ, 7 հուլիսի — Sputnik, Նելլի Դանիելյան. Հայաստանում նոր ներդրումները խթանելու նպատակով մեկ հարկի տակ էին հավաքվել հայ ու արտասահմանցի գործարարները, կառավարության անդամներն ու դիվանագետները։
Իտալացի գործարար Ֆիլիպո Դուցիոնին Հայաստանում գործունեությունը սկսել է 3 տարի առաջ` ճանապարհաշինության բնագավառում։ Ավելի ուշ փոխել է գործունեության ասպարեզն ու որոշել է հայ սպառողներին իսկական իտալական պիցցա առաջարկել։
«Մեր հիմնական նպատակը սառեցված պիցցայի արտադրությունն է Հայաստանում և մեր արտադրանքի արտահանումը։ Համոզված ենք, որ կկարողանանք սրանով խթանել նաև Հայաստանի տնտեսությունը».- ասաց գործարարը։
Հայաստանում աշխատելու միակ դժվարությունն իտալացի գործարարը համարում է իսկական իտալական պիցցայի տեխնոլոգիայի ներդրումը։ Մնացած ամեն ինչից, այդ թվում` հարկային դաշտից Դուցիոնին գոհ է և նույնիսկ վստահեցնում է, թե Իտալիայում աշխատելն ավելի դժվար է, քան Հայաստանում։
Իտալացի գործարարի լավատեսությունը մեր երկրում այնքան էլ չեն կիսում։ Գործարարության աջակցության գրասենյակի ղեկավար Գևորգ Պողոսյանը նշեց, որ ներդրումներ գրավելն ու արտասահմանցի գործարարներին Հայաստան բերելն այնքան էլ հեշտ չէ և կարող է ավելի դժվարանալ նոր Հարկային օրենսգրքի ընդունումից հետո։
«Դիվիդենտներն այսուհետ 10 տոկոսով հարկվելու են, արդյունքում արդեն օտարերկրյա ներդրողների համար հետաքրքիր չի լինի Հայաստանում ներդրումներ իրականացնելը, քանի որ աշխատելու համար կգտնեն այլ երկրներ»,- ասաց նա։
ՊԵԿ նախագահ Հովհաննես Հովսեփյանը, սակայն, ճիշտ հակառակ կարծիքի է։ Նրա համոզմամբ` նոր օրենսգրքի նպատակը հենց ներդրումները խթանելն է։
«Մենք փորձում ենք բիզնեսի ներկայացուցիչների առաջարկները, նկատառումները, դիտողությունները հաշվի առնել և մինչև երկրորդ ընթերցում տանել ԱԺ, դրանից հետո նոր կկարողանանք ավելի մանրամասն խոսել դրա մասին։ Բայց կարող եմ վստահեցնել, որ նոր հարկային օրենսգիրքը մի նպատակ ունի` նպաստել բիզնես միջավայրին ու ավելի կառավարելի, տեսանելի դարձնել բիզնեսի ապագան»,- լրագրողների հետ զրույցում ասաց ՊԵԿ նախագահը։
Իսկ ներդրումները խթանելու և գործարարության առաջ ծառացած խնդիրները հարթելու նպատակով Հայաստանում շուրջ մեկ տարի առաջ ստեղծվել էր Եվրոպական բիզնես ասոցիացիան, որն այսօր մեկ հարկի տակ էր հավաքել ՀՀ գործարարներին, կառավարության անդամներին ու դիվանագետներին։
«Բիզնեսի հեռանկարները, խոչընդոտներն ու հնարավորությունները Հայաստանում» խորագրով գործարար համաժողովի բացմանն իր ելույթում ՀՀ վարչապետ Հովիկ Աբրահամյանը հայտարարեց, որ կառավարությունն ամեն ինչ անում է, որպեսզի օտարարերկրյա ներդրողներն իրենց հարմարավետ ու ապահով զգան Հայաստանում։
Ըստ վարչապետի` Հայաստանը կարևոր դեր ունի ԵԱՏՄ-ի և ԵՄ-ի հարաբերություններում։
«Հաշվի առնելով ՀՀ-ի` ԵԱՏՄ անդամակցությունից, մյուս կողմից` ԵՄ-ի հետ առևտրում GSP+ արտոնյալ առևտրային արտոնյալ ռեժիմից օգտվելու հնարավորությունները` Հայաստանը կարող է յուրօրինակ կամուջ դառնալ ԵԱՏՄ և ԵՄ միջև»,- ասաց վարչապետը։
Հայաստանում ԵՄ պատվիրակության ղեկավար, դեսպան Պյոտր Սվիտալսկին ևս ընդգծեց, որ կամրջաշինության ասպարեզում հայտնի հայերն ի զորու կլինեն Հայաստանն ու Եվրոպան իրար կապող կամուրջ ստեղծել։ Սվիտալսկին հույս հայտնեց նաև, որ առաջիկա ամիսներին Եվրոպական բիզնես ասոցիացիայի և եվրոպական համայնքի ջանքերով կհաջողվի նոր էջ բացել Հայաստանի ու արտերկրի գործարարների հարաբերություններում:
«Հայերն իրենց գենետիկ կոդով արդեն իսկ ձեռնարկատիրական ջիղ ունեն, ընդամենը նրանց համար պետք է տարածք, ապահովություն և կանխատեսելի օրենսդրություն ապահովել»,- ասաց Սվիտալսկին։
Իսկ Հայասստանում ստեղծված քաղաքական միջավայրը, դեսպան Սվետալսկու համոզմամբ, նպաստավոր է բիզնեսի զարգացման համար։ Իսկ նոր ներդրողներ գտնելու հարցում ԵՄ պատվիրակության ղեկավարը խոստացավ ոչ միայն իր, այլև Հայստանում ներկայացված եվրոպական դիվանագիտական ողջ կորպուսի աջակցությունը։
