ԵՐԵՎԱՆ, 23 հուլիսի-Sputnik. Նիկոլ Փաշինյանը շուրջ 5 րոպեանոց ճառով դիմեց Մ. Խորենացի փողոցում հավաքվածներին։ Նա ներկաներին վստահեցրեց, որ հենց նրանք են այս երկրի տերն ու միայն նրանք կարող են որոշում կայացնել։ Իսկ եթե Փաշինյանն ինքը այդ որոշումը համարի աներկբա ու վճռական, ուրեմն ամեն ինչ կանի այն ի կատար ածելու համար։
«Ես ո՞վ եմ, որ ձեր փոխարեն որոշեմ, դուք եք այս երկրի տերը, ես ձեր որոշմանը հարգանքով կվերաբերվեմ»,-ասաց Փաշինյանը։
Նրան հաջորդեց Ալեք Ենիգոմշյանը. «Հիմնադիր խորհրդարանի» անդամն ընդգծեց, որ խորին հարգանոքով է վերաբերվում Նիկոլ Փաշինյանին, սակայն ճիշտ չի համարում նրա կողմից իր քաղաքական հայացքները «Սասնա ծռեր» զինված խմբի գործողություններին պրոյեկտելը։
«Նիկոլ Փաշինյանը մերժեց մաս կազմել մեր միասնական մարմնին։ Դա նրա որոշումն է։ Ոչ ոք չի կարող նրանց արգելել մտածել, որ միակ ընդդիմությունն են։ Բայց «Սասնա ծռերի» գործողության հետևանքով ստեղծված հարթակը չի կարելի նման նպատակներով օգտագործել»,-ասաց Ենիգոմշյանը։
Չնայած իրար հակասող կարծիքներին` Ենիգոմշյանը հայտարարեց, որ Նիկոլ Փաշինյանի առջև չի փակվում հանրահավաքի հարթակը, նա դեռ կարող է մասն կազմել համակարգող խորհրդի։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ էին վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ Զինված խնբի անդամների հետ բանակցություններ են ընթանում, որոնց արդյունքում ազատ արձակվեցին բոլոր պատանդ վերցված ոստիկանները։ Սակայն խմբի անդամները շարունակում են մնալ գնդի տարածքում, իսկ Հայաստանի քաղաքացիները բոլոր այդ օրերի ընթացքում հավաքվում և հանրահավաքներ են անցկացնում գնդի հարակից Խորենացի փողոցում։
