ԵՐԵՎԱՆ, 23 հուլիսի — Sputnik. «Սասնա ծռեր» խմբի անդամները լրագրողներին ասացին, որ չեն պատրաստվում վայր դնել զենքը։
«Հիմնադիր խորհրդարանի» մամուլի խոսնակ Վարուժան Ավետիսյանը նշեց, որ շարժումը կառուցվածքային ձև է ստանում, և իրենք կստանան այն, ինչ երազել են` լավ Հայաստան։
Նա հայտնեց, որ Վիտալի Բալասանյանի հորդորների ազդեցությամբ փորձել են ճանապարհ գտնեl և ձերբազատվել «պատանդ» երևույթից, որովհետև քաղաքակական գործընթացում պատանդ երևույթն անընդունելի է, և իրենք գտան ճանապարհը։
Նա հայտնեց, որ լրատվամիջոցների ներկայացուցիչները կարող ենք հերթապահել գնդի տարածքում, այս ընթացքում «մենք կհանդիպենք, կքննարկենք, հարցազրույցներ կլինեն»։ Եթե նորից անջատեն ինտերնետը, ինչ-որ լծակներ կկիրառենք»։
Նա նշեց, որ եթե կառավարության հրաժարականը լինի, նոր կառավարություը չպետք է բաղկացած լինի ՀՀԿ-ից և նրանց հետ գործակցած կուսակցությունների ներկայացուցիչներից, պետք է ունենա անցումային մանդատ, նախագահի պաշտոնը զբաղեցնող անձը պետք է ունենա սահմանափակ լիազորություններ, որոշ ժամանակ անց հեռանա` ապահովելով փափուկ անցում։
Հիշեցնենք, որ Հայաստանի լրատվամիջոցների ներկայացուցիչները գտնվում են «Սասան ծռեր» զինված խմբի կողմից գրավված Ոստիկանության ՊՊԾ շենքում։ Նրանց թվում է նաև Sputnik Արմենիայի լրագրողը։
«Սասնա ծռեր» խմբի անդամներն ավելի վաղ հանդիպել էին ԱԱԾ տնօրեն Գեորգի Կուտոյանի հետ, և որոշում էր կայացվել ազատ արձակել պատանդներին՝ պայմանով, որ ստեղծվելու է մամուլի կետ։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ էին վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ Զինված խնբի անդամների հետ բանակցություններ են ընթանում։
