ԵՐԵՎԱՆ, 21 հուլիսի — Sputnik. Երևանի Խորենացու փողոցում նախօրեին ցուցարարների և ոստիկանների միջև տեղի ունեցած ընդհարումից հետո տարաբնույթ մեկնաբանություններ հչնեցին այնտեղ Փաշինյանի ունեցած դերակատության մասին։ Ինչպես Փաշինյանը հայտարարեց ասուլիսում, մի մասն իրեն մեղադրել է տեղի ունեցածի համար, մյուս մասը` ինչ-որ բանի, որ տեղի չի ունեցել։
Փաշինյանը հայտարարեց, որ ինքն այնտեղ որևէ դերակատարություն չի ունեցել, հավաքին մասնակցել է բացառապես որպես միջնորդ, քանի որ պարոն Եղնուկյանն իրեն զանգել և ասել է, որ «Սասնա ծռեր» խմբի անդամները սննդի խնդիր ունեն։
«Որևէ մեկը չի կարող ասել, որ ես փորձել եմ ներկայացնել «Սասնա ծռերին» կամ որևէ մեկին, իմ գործողությունները համապատասխանել են բացառապես իմ կուսակցության քաղաքական ծրագրին»,- ասաց Փաշինյանը` հավելելով, որ իր ղեկավարած «Քաղաքացիական պայմանագիր» կուսակցության քաղաքականությունը լուծումները բացառապես խաղաղ ճանապարհով գտնելն է։
Sputnik Արմենիայի հարցին, թե ինչ իրավիճակ պետք է փոխվի, որ Փաշինյանը դարձյալ գնա Խորենացի փողոց, նա պատասխանեց.
«Այնտեղ պետք է հավաքված լինի այն ժողովուրդը, որ երեկ իմ խնդրանքով ձեռքերը բարձրացրեց` ցույց տալու համար, որ իր ձեռքում չկա ոչինչ»։
Նա նշեց, որ այլևս Խորենացու փողոց չի գնա, քանի դեռ այնտեղ հավաքվածները և ինքն անձամբ իր այնտեղ գտնվելու անհրաժեշտությունը չեն զգա։
Անդրադառնալով հարցին, թե որտեղ են անցած հինգ օրերին եղել ընդդիմությունը և իշխանությունը, Փաշինյանը պատասխանեց.
«Հայաստանում կա մեկ ընդդիմություն, որը «Քաղաքացիական պայմանագիր» կուսակցությունն է, և այդ ընդդիմությունն այնտեղ է, որտեղ պետք է լինի»։
Իշխանության և այլ քաղաքական կուսակցությունների վերաբերյալ Փաշինյանը հրաժարվեց որևէ մեկնաբանություն անել։
