ԵՐԵՎԱՆ, 21 հուլիսի — Sputnik. Անհանդուրժողականության մեծ ալիք կա հասարակության շրջանում, բայց քաղաքական խնդիրներն այդպես չեն լուծվում, հինգշաբթի կառավարության նիստից հետ լրագրողներին ասաց Հայաստանի էկոնոմիկայի նախարար Արծվիկ Մինասյանը` անդրադառնալով ոստիկանության գրավված գնդի շուրջ ստեղծված իրավիճակին։
«Ես հույս ունեմ, որ այնքան ողջամիտ կգտնվի զինված խումբը, որ խնդիրը կլուծվի բանակցություններով, և իրավիճակը կլիցքաթափվի»,- ասաց Մինասյանը։
Մինասյանը նշեց, որ ճանաչում է զինված խմբի անդամներից մի քանիսին, ու ցավում է, որ նման իրավիճակ է ստեղծվել։
Լրագրողների այն հարցին, թե Մինասյանի համար այդ զինված խմբի անդամները ապստամբներ են, թե ահաբեկիչներ, նա ասաց, որ Քրեական օրենսգրքի հոդվածներում կա նկարագրված` «պատանդ վերցնել» ինչ է նշանակում:
«Ես` որպես կոալիցիայի անդամ, քաղաքական ուժի ներկայացուցիչ, ասում եմ, որ այս պահին գործընթացը գտնվում է իրավապահ համակարգի տիրույթում։ Թողեք հանգուցալուծվի, ավելորդ լարվածություն պետք չէ ստեղծել»,– ասաց նախարարը։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
