ԵՐԵՎԱՆ, 21 հուլիսի — Sputnik. Բռնությամբ անհնար է անցնել իրական փոփոխությունների, այդ մասին հինգշաբթի կառավարության նիստի ժամանակ հայտարարեց վարչապետ Հովիկ Աբրահամյանը՝ խոսելով Ոստիկանության պարեկապահակային ծառայության (ՊՊԾ) գնդի գրավված տարածքում ծավալվող իրադարձություններին:
«Այն, ինչ տեղ ունեցավ գնդում անթույլատրելի է և դատապարտելի, որովհետև բռնությամբ անհնար է անցնել իրական փոփոխությունների: Այն վտանգավոր և անհեռանկար գործընթաց է: Իրավիճակը խիստ մտահոգիչ է իշխանությունն ամեն ինչ անում է և անելու է հասնելու դրա խաղաղ հանգուցալուծմանը»,- ասաց նա:
Նա բոլորի անունից ցավակցություն հայտնեց զոհված գնդապետ Արթուր Վանոյանի ընտանիքին, հարազատներին ու զինակից ընկերներին։
Ոստիկանությունը հուլիսի 20- լույս 21-ի գիշերն առավոտյան ժամը 4։30-ի սահմաններում հատուկ գործողություն իրականացրեց Քրիստափորի և Խորենացու փողոցների խաչմերուկում և րոպեների ընթացքում ցրեց ցույցը։ Մինչ այդ հուլիսի 20-ի երեկոյան բախում տեղի ունեցավ ոստիկանության և ցուցարարների միջև։ Իրավիճակը սրվեց այն բանից հետո, երբ ցուցարարները պահանջեցին լուծել ներսում գտնվող անձանց սննդի խնդիրը։ Հետո Նրանք քարեր նետեցին ոստիկանների վրա, նրանք էլ պատասխանեցին լուսաձայնային և ծխային նռնակներով։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
