ԵՐԵՎԱՆ, 20 հուլիսի-Sputnik. Ֆրանսիայի Ազգային ժողովի պատգամավորները հուլիսի 20-ին քվեարկել են արտակարգ դրությունը ևս վեց ամսով երկարացնելու մասին կառավարության օրինագծի օգտին, հաղորդում է ՌԻԱ Նովոստին։
Մանուել Վալսի կառավարությունն առաջարկել է երկարացնել արտակարգ դրությունը երեք ամսով, սակայն պատգամավորներն արտահայտվել են այդ ժամկետը երկարացնելու օգտին։
Ֆրանս Պրես գործակալության տվյալներով, ավելի քան 7 ժամ տևած լսումներից հետո կողմ է քվեարկել 489 մարդ, դեմ` 26, ձեռնպահ են մնացել չորսը։
Չորեքշաբթի օրինագիծը կներկայացվի սենատի քննարկմանը։
Նոյեմբերին 13-ին Փարիզում տեղի ունեցած ահաբեկչությունից հետո սահմանված արտակարգ դրության ժամկետը լրանում է հուլիսի 26-ին։ Ենթադրվում էր, որ այն այլևս չի երկարացվելու. դեռ հուլիսի 14-ին այդ մասին հայտնել էր Ֆրանսիայի նախագահ Ֆրանսուա Օլանդը։ Սակայն Նիսի ահաբեկչությունից հետո նա փոխել է իր որոշումը։
Արտակարգ դրությունն իրավապահ մարմիններին իրավունք է տալիս տնային կալանքի տակ պահել ցանկացած անձի, որի գործողությունները կարող են վտանգ ներկայացնել։ Առաջին հերթին խոսքը գնում է երկրի բնակիչների մասին, որոնք հայտնվել են հատուկ ծառայությունների տեսադաշտում։
