ԵՐԵՎԱՆ, 18 հուլիսի — Sputnik. Ոստիկանության բաժանմունքի զինված գրոհի ժամանակ հրազենային վնասվածք ստացած ոստիկանության գնդապետ Արամ Հովհաննիսյանը վիրահատվել է, լրագրողներին հայտել է ՀՀ ՊՆ կենտրոնական կլինիկական զինվորական հոսպիտալի վիրաբուժական բաժանմունքի պետ Սևակ Շահբազյանը «Մուրացան» ռազմական հոսպիտալում։
«Որովայնի շրջանում հրազենային վնասվածք ստացած գնդապետ Արամ Հովհաննիսյանը վիրահատվել է։ Ներկա պահին նրա առողջական վիճակը գնահատվում է բավարար», — ասաց Շահբազյանը։
Նույն օրը հոսպիտալ է տեղափոխվել փոխգնդապետ Հրաչյա Խոստեղյանը։ Նա ստացել է ամբուլատոր բուժում և նույն օրը դուրս է գրվել։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
