ԵՐԵՎԱՆ, 18 հուլիսի — Sputnik. Վերջին երկու ժամվա ընթացքում Ոստիկանությունը մոտ մեկ տասնյակ մարդու է բերման ենթարկել Էրեբունու Ոստիկանության պարեկապահակային գնդի հարակից տարածքից, հայտնում է Sputnik Արմենիայի թղթակիցը։
Ըստ հաղորդման` մարդկանց բերման ենթարկելու համար որևէ հիմնավորում, պատճառաբանություն և մարդկանց անունները ոստիկանները չեն հրապարակում, լրագրողների հարցերին չեն պատասխանում։
Դեպքի վայրում գտնվող ակտիվիստները նշում են, որ բերման ենթարկվածներն իրենց ընկերներն են, մասնավորապես` Կարո Եղնուկյանի երկու դուստրերը` Սիմա և Էլմանե Եղնուկյանները, Անուշիկ Հարությունյանը, Արման Հարությունյանը, Մաքսիմ Սարգսյանը, Անտոն Իվչենկոն, ով, ի դեպ, հենակներով է տեղաշարժվում և մյուսները։
Աղջիկները բերման են ենթարկվել այն բանի համար, որ պաստառ էին գրում` «Այլ ելք չկա» բովանդակությամբ։
Այժմ ոստիկանության գնդի հարակից տարածքում են իրավապաշտպաններ Արթուր Սաքունցը, Ավետիք Իշխանյանը, Գյումրու «Ասպարեզ» ակումբի նախագահ Լևոն Բարսեղյանը։
Վերջինները Sputnik Արմենիայի հետ զրույցում հայտնեցին, որ ոստիկանությունը որևէ ընթացակարգ չի պահպանում, բերման ենթարկվողների իրավունքները որևէ կերպ չեն պաշտպանվում։ Բարսեղյանն էլ հայտնեց, որ մարդկանց բերման են ենթարկել նաև Գյումրիում, որտեղ հայտնի ակտիվիստներին բերման ենթարկում տներից։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
