ԵՐԵՎԱՆ, 18 հուլիսի-Sputnik. Փոխոստիկանապետ Հունան Պողոսյանն այսօր հաստատեց տեղեկությունն այն մասին, որ ազատ են արձակվել պատանդներ, մասնավորապես, մեկ ոստիկան՝ ՊՊԾ աշխատակից, եւ մեկ քաղաքացիական անձ, որը շտապօգնության մեքենայի վարորդ է։ Հունան Պողոսյանը ՊՊԾ-ն գրաված խմբավորման այդ քայլը որակեց բարի կամքի դրսեւորում։
Պատանդ է մնում դեռեւս 5 անձ, բոլորը՝ ոստիկան։ Ձերբակալված եւ բերման ենթարկված քաղաքացիները ազատ են արձակվել, սակայն նրանցից ոմանք ենթարկվել են վարչական պատասխանատվության, ոմանց էլ հրավիրել են հարցաքննության։
Հունան Պողոսյանը նշեց, որ բանակցությունները շարունակվում են։ Նա չբացահայտեց բանակցող ոստիկանության սպայի եւ ներսում գտնվող զինված խմբավորման ներկայացուցչի ինքնությունը, սակայն նշեց, որ ոստիկանապետ Վլադիմիր Գասպարյանը բանակցություններին չի մասնակցում, համապատասխան վայրից ղեկավարում է գործողությունները։
Ինչ վերաբերում է բանակցությանը Ժիրայր Սեֆիլյանի մասնակցելուն, Sputnik Արմենիային փոխոստիկանապետը տեղեկացրեց, որ նա եւս չի մասնակցում բանակցություններին, ոստիկանությունը նրա հետ չի հանդիպել առայժմ։
Հունան Պողոսյանը հաստատեց իշխանության պահանջը. «Մեր պահանջները մնում են նույնը. ազատ արձակել բոլոր պատանդներին, դադարեցնել իրավիճակի սրումը, հանձնվել իշխանությանը»,- ասաց նա։ Նա նաեւ նշեց, որ բանակցությունների ձախողման դեպքում իրավապահ մարմինները կարող են ձեռնարկել օրենքով թույլատրելի բոլոր միջոցառումները։
