ԵՐԵՎԱՆ, 17 հուլիսի — Sputnik. Ոստիկանությունն Ազատության հրապարակին հարող տարածքում րոպեներ առաջ երկու քաղաքացու ձերբակալեց, հայտնում է Sputnik Արմենիայի թղթակիցը։
Ձերբակալված երիտասարդներից մեկն ասաց, որ իրենք պարզապես քայլում էին Հյուսիսային պողոտայով, և իրեն առանց որևէ բացատրության են բերման ենթարկել։
Տարածքում գտնվող մարդիկ ասացին, որ առավոտից շուրջ 10 մարդ են բերման ենթարկել այս տարածքում, նրանց միանգամից նստեցրել են ոստիկանական ավտոմեքենաները և տարել։
«Եթե ցույց լիներ, դեռ հասկանալի կլիներ, սակայն այսպես առանց որևէ բացատրության վերցրել ու տարել են», — ասացին նրանք։
Ոստիկանները լրագրողների հարցերին չեն պատասխանում, միայն ասում են` դիմեք 02 լրատվական։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
Ազգային անվտանգության աշխատակիցները փորձում է բանակցություններ վարել ոստիկանության շենքը գրավողների հետ։ Դեպքի վայրում են ՀՀ ոստիկանության և ԱԱԾ բարձրաստիճան պաշտոնյաները։ Մեկ ոստիկան զոհվել է, ևս երկուսը՝ վիրավորվել:
