ԵՐԵՎԱՆ, 15 հուլիսի-Sputnik. Թունիսի ներքին գործերի նախարարությունը պարզել է ահաբեկչի անձը, որն ահաբեկչություն է կատարել ֆրանսիական Նիսում։ Նա 31-ամյա Մոհամեդ Բուհլելն է` երկրի արևելքում գտնվող Մսակեն քաղաքից, հաղորդում է Sputnik գործակալությունը։
Հուլիսի 14-ի երեկոյան մարդիկ հավաքվել էին Նիսի Անգլիական ափին` դիտելու Բաստիլի գրավման օրվան նվիրված հրավառությունը։ Ականատեսների տվյալներով` բեռնատարը մտել է ամբոխի մեջ, վարորդը զիգզագաձև վարելով` անցել է 2 կմ` վրաերթի ենթարկելով մարդկանց, ինչպես նաև կրակ է բացել նրանց ուղղությամբ։ Զոհվել է 84 մարդ, վիրավորվել` ավելի քան 200-ը։ Բեռնատարը ոչնչացվել է ոստիկանության կողմից։ Ֆրանսիայի նախագահը սա ահաբեկչություն է որակել։
«Պարզվել է ահաբեկչի անձը, նրա անունն է Մոհամեդ Լահուաեջ Բուհլել։ Նա ծնվել է Թունիսում 1985թ-ին` Սուս նահանգի Մսակեն քաղաքի Վադի ալ Ջաբալի շրջանում։ Այդ տեղեկատվությունը ստացվել է օդանավակայանի ղեկավարության և ՆԳՆ-ի հետ փոխգործակցության արդյունքում»,- գործակալությանը հայտնել է Թունիսի ՆԳՆ-ի աղբյուրը։
Աղբյուրը հաստատել է, որ Բուհլելն արդեն չորս տարի չի այցելել Թունիս։
Ավելի վաղ ֆրանսիական ԶԼՄ-ները հաղորդել էին, որ Նիսում ահաբեկչության ենթադրյալ կատարողին ոստիկանությունը տարեսկզբին ձերբակալել է բռնության հետ կապված իրավախախտման համար։
Ինչպես հաղորդում է ՌԻԱ Նովոստին` հղում անելով Daily Mail-ին, Նիսում ահաբեկչություն գործած չարագործը 9 ժամ սպասել է փողոցում կայանված բեռնատարում, այդ ընթացքում ոստիկանությունը մոտեցել է նրան, բայց չի զննել։
«Նիսի ահաբեկիչը վարձել է բեռնատարը երկու օր առաջ։ Նա կանգնեցրել է մեքենան փողոցում ահաբեկչությունից 9 ժամ առաջ, իսկ ոստիկանության հարցերին պատասխանել է, որ պաղպաղակ է առաքում։ Թեև ոստիկանները հարցեր են տվել բեռնատարի վարորդին, բայց ոչինչ չեն արել, և նա մնացել է մեքենայում` սպասելով հարձակման հնարավորությանը։ Տարբեր տեղեկություններով` ոստիկանությունը թույլ է տվել մեքենային կանգնած մնալ ափին, քանի որ նա պնդել է, որ պաղպաղակ է առաքում»,- գրում է հրատարակությունը։
