ԵՐԵՎԱՆ, 15 հուլիսի — Sputnik. Հուլիսի 14-ին Նիսի Անգլիական ծովափին ահաբեկչության հետևանքով զոհված Հայաստանի քաղաքացին վերջերս ամուսնացել էր Նիսում բնակվող հայի հետ և Մոսկվայից այնտեղ տեղափոխվել։
Աղջիկը զոհվել է մարդկանց վրաերթի ենթարկող բեռնատարի հարվածից։
«Նա վերջերս էր ամուսնացել և Մոսկվայից Նիս տեղափոխվել։ Ամուսինը ողբերգության պահին գտնվում էր նրա կողքին, նրան հաջողվել է հրաշքով փրկվել», — Sputnik Արմենիային հայտնել է զոհվածի ընտանիքի ընկերը։
Նիսում բնակվող ևս մի հայուհի փոքրիկ որդու հետ նույնպես ողբերգության պահին գտնվել է Անգլիական ծովափում։
Նրան հաջողվել է մանկասայլակը, որի մեջ պառկած էր երեխան, հրել ապահով վայր և պառկել դրա վրա` փակելով երեխային կրակոցներից։ Այդպես նրանց հաջողվել է փրկվել։
Ավելի վաղ Հայաստանի ԱԳՆ-ն հաստատել էր ՀՀ քաղաքացու մահվան փաստը։
Հինգշաբթի երեկոյան մարդիկ հավաքվել էին Նիսի Անգլիական ափին` դիտելու Բաստիլի գրավման օրվան նվիրված հրավառությունը։ Ականատեսների տվյալներով` բեռնատարը մտել է ամբոխի մեջ, վարորդը զիգզագաձև վարելով` անցել է 2 կմ` վրաերթի ենթարկելով մարդկանց, ինչպես նաև կրակ է բացել նրանց ուղղությամբ։ Զոհվել է 80 մարդ, վիրավորվել` 18-ը։ Բեռնատարը ոչնչացվել է ոստիկանության կողմից։ Ֆրանսիայի նախագահը սա ահաբեկչություն է որակել։
Նիսի ահաբեկչությունը դարձավ երրորդ խոշոր հարձակումը Ֆրանսիայում վերջին կես տարվա ընթացքում։ 2015 թվականի հունվարին և նոյեմբերին հինգերորդ հանրապետությունը արդեն վերապրել է երկու սարսափելի ողբերգություն` 2015 թվականի հունվարի 7-ին Շառլի Էբդո երգիծական պարբերականի խմբագրության վրա հարձակումը և 2015 թվականի նոյեմբերի 13-ին Փարիզում ահաբեկչությունների շարքը։
