ԵՐԵՎԱՆ, 14 հուլիսի-Sputnik. Հայաստանն առանձին տաղավարով կմասնակցի «Մոսկովյան մուրաբա։ Բնության ընծաներ» փառատոնին, որի ընթացքում կներկայացվեն մուրաբաների տարբեր տեսակներ, այդ թվում էկզոտիկ տեսակ` սմբուկի մուրաբա։
Մոսկվայի իշխանությունները որոշել են միավորել «Մոսկովյան մուրաբա» և «Բնության ընծաներ» փառատոնը և անցկացնել այն հուլիսի 15-ից օգոստոսի 7-ը, քաղաքում կտեղակայվի 33 թեմատիկ տաղավար, որտեղ կարելի է համտեսել մրգեր, մուրաբա, խորտիկներ և խմիչք տարբեր երկրներից։
Ինչպես հաղորդում է riamo.ru-ն` հղում անելով փառատոնի կազմկոմիտեին, յուրաքանչյուր հարթակում այցելուները կարող են տեսնել մուրաբայի հսկայական տարաներ, որոշ կետերում անվճար մուրաբա կբաժանեն։
«33 տաղավար կլինի։ Մուրաբայի տարաների վրայի պատկերները նման են մուրաբայի այն տեսակներին, որոնք կներկայացվեն փառատոնի հարթակներում։ Օրինակ, Հայաստանի հարթակում կարելի է տեսնել սմբուկի մուրաբայի տարա»,- հաղորդել է կազմակերպիչ ընկերության ներկայացուցիչ Իրինա Սուխոտինան։
Բացի այդ, հյուրերին սպասվում են շուրջ 800 անվճար վարպետության դասեր և ներկայացումներ։
