ԵՐԵՎԱՆ, 13 հուլիսի-Sputnik. Արմենուհի Մխոյան. Հունիսի 24-ին գրանցված ուժեղ ջրհեղեղից հետո Սոֆիկ Պետրոսյանը որդու հետ ստիպված հայրական տանն է գիշերում՝ սեփական տունը ո՛չ դուռ ունի, ո՛չ պատուհան, ո՛չ էլ՝ հատակ ու կոյուղի: Տիկին Սոֆիկն առավոտյան էլ նկատել է, որ ջրհեղեղի հետևանքով ճաքեր տված պատը երկու մասի է բաժանվել՝ մի ամբողջ ձեռք կարելի էր մտցնել այդ արանքից: Հիմա մտածում է ՝ որն անի, որ քանդվածը վերականգնի:
Տիկին Սոֆիկի նման ևս 11 ընտանիք կա Արթիկում, որոնք առավել շատ են տուժել բնական աղետից: Ջուրը, հոսքը փոխելով, ոմանց տունն է ավերել, մյուսների՝ անասնագոմը, իսկ այգիների մասին խոսելն ավելորդ է. ոչ մի բան չի հիշեցնում, որ այստեղ մի ամիս առաջ այգի է եղել:
Կառավարությունը սելավատարի ու տարածքի մաքրման, հունի վերականգնման աշխատանքներ է կատարում. շուրջ 800 բեռնատար աղբ՝ քար, տիղմ ու ավազ է արդեն տեղափոխվել տարածքից: Բնակիչներն են հավաստում՝ «աշխատանքները լավ են կատարում»:
Սակայն նույնիսկ այս գործընթացը հույսեր չի տալիս, որ ջրհեղեղի վնասները վերացնել հնարավոր է: Գումարի չափն էլ բնակիչներին չի գոհացնում՝ այն չէ, ինչ սպասում էին՝ կորցրել են շատ ավելին: Նրանք նշում են, որ հատկացված գումարը քիչ է տունը ապրելու պիտանի դարձնելու համար:
Իրենց դժգոհությունը բնակիչները հնարավորություն ունեցան ՀՀ վարչապետին հայտնել հուլիսի 13-ին. Արթիկում տեղի ունեցած ջրհեղեղի պատճառած վնասների վերացման աշխատանքներին ծանոթանալու նպատակով քաղաք էր այցելել Հովիկ Աբրահամյանի գլխավորած պատվիրակությունը:
Վարչապետը եղավ առավել տուժած «Անկախության» փողոցում գտնվող հեղեղատարի տարածքում, ծանոթացավ մաքրման աշխատանքներին, շրջեց հարակից տներում, հարցրեց բնակիչների խնդիրների մասին:
Ընդհանուր առմամբ հունիսի 24-ին գրանցված ջրհեղեղի հետևանքով Արթիկում 2 հեղեղատարների մոտ գտնվող 41 տուն է վնասվել, սակայն առավել շատ տուժել է 12 տուն։ Հենց այդ 12-ին էլ, հատուկ հանձնաժողովի որոշմամբ, հատկացվել է դրամական փոխհատուցում. գումարի չափը տարբեր է ՝ կախված վնասից: Հանձնաժողովը գումարի հաշվարկը կատարել է ըստ վնասված քառակուսի մետրերի՝ շուկայական գներով, իսկ ընտանի կենդանիների մասով` ըստ գլխաքանակի:
ՀՀ կառավարությունը հատկացրել է 42 մլն դրամ՝ հեղեղատարը կարգի բերելու և բնակիչներին աջակցություն տրամադրելու համար, դրանից բացի ևս 5 մլն դրամ բնակիչներին կհատկացվի քաղաքապետարանի կողմից. այդ գումարը Արթիկի քաղաքապետարանին տրամադրել են բարերարները:
«Գործընթացը նորմալ է ընթանում, մաքրվում է տարածքը: Այն, ինչ տեսել եմ ջրհեղեղից անմիջապես հետո ու հիմա՝ լրիվ այլ բաներ են: Քննության խնդիր կա հանձնաժողովի ուսումնասիրությունների և տուժած ընտանիքներին հատկացված գումարի հետ կապված։ Կքննարկենք, ու եթե հիմնավորումները հաստատվեն, մենք կավելացնենք այդ ընտանիքներին տրամադրվող գումարների չափը»,- լրագրողներին ասաց ՀՀ վարչապետ Հովիկ Աբրահամյանը:
Վարչապետն ընդգծեց նաև, որ ծախսը կարևոր չէ, կարևոր է օբյեկտիվ գնահատականը և այն, որ մարդիկ կարողանան վերականգնել իրական կորուստը: Նրա խոսքով` կքննարկվի նաև սելավատարի վրա կառուցված ապօրինի շինության հարցը. այն կվերացվի, քանի որ խոչընդոտում է ջրի հոսքին։
Ջրհեղեղի տարածքի մաքրման աշխատանքները կշարունակվեն։ Իսկ արթիկցիները կատակում են՝ Հռոմի պապը Գյումրի եկավ, Նոյը՝ Արթիկ:
