ԵՐԵՎԱՆ, 13 հուլիսի-Sputnik. Հայտնի ռոք երաժիշտ, «Օկեան Էլզի» խմբի առաջնորդ Սվյատոսլավ Վակարչուկն անվանի ռեժիսոր Ռոման Բալայանի նոր «Հրեշտակը» ֆիլմում կկատարի գլխավոր դերը։
Նախնական տվյալներով` ֆիլմի նկարահանումները կսկսվեն հաջորդ տարվա մայիսին և կընթանան Ուկրաինայում։
Ռեժիսորը չբացահայտեց ապագա ֆիլմի մանրամասները և միայն ասաց, որ այն պատմում է 17-ամյա «աստծո խենթ» աղջկա մասին։
«Աղջիկը գտնվում է հոգեբուժարանում և ամեն տարի փախչում է այնտեղից։ Ֆիլմի վերջում պարզվում է, որ նա ամենևին էլ խելագար չէ»,- ասաց Բալայանը։
Խոսելով հայկական կինեմատոգրաֆի մասին` նա նշեց, որ երկրում շատ տաղանդավոր երիտասարդ ռեժիսորներ կան, սակայն նրանք զարգանալու հնարավորություն չունեն։
Ռեժիսորի խոսքով` Հայաստանում կինոն շատ բաների կարող է հասնել, սակայն այն դեռ զարգանալու տեղ ունի։
Մեկնաբանելով Մայր աթոռ սուրբ Էջմիածնում ստացած պարգևը` նա նշեց, որ «ավելի արժանի հավակնորդներ կային»։
Բալայանի խոսքով` ինքը չի վազում պարգևների հետևից, բայց «Եղիցի լույսը» նշանակալից է իր համար, քանի որ այն հանձնվել է «սուրբ երկրում»։
