ԵՐԵՎԱՆ, 13 հուլիսի — Sputnik. Անվանի կինոռեժիսոր, սցենարիստ, պրոդյուսեր Ռոման Բալայանը չորեքշաբթի Մայր աթոռ սուրբ Էջմիածնում ստացավ Հայ առաքելական եկեղեցու «Եղեցի լույս» պարգևը։ Դափնեկրին ընտրել էր Ամենայն Հայոց Գարեգին Բ կաթողիկոսի որոշմամբ ստեղծված հատուկ հանձնաժողովը։
Բալայանին պարգևը հանձնեց Գևորգյան հոգևոր ճեմարանի տեսուչ և Մայր աթոռի հոգևոր բարձրագույն հաստատությունների վերատեսուչ տեր Գևորգ եպիսկոպոս Սարոյանը։
2012թ-ին ստեղծված «Եղիցի լույսի» առաջին պարգևին արժանացել էր ռեժիսոր Ալեքսանդր Սոկուրովը։
Բալայանը սակավախոս էր և ասաց, որ շատ հուզված է և շնորհակալ բոլորին։ Միաժամանակ նա հույս հայտեց, որ հաջորդ տարի այս պարգևին կարժանանա հանճարեղ կոմպոզիտոր Տիգրան Մանսուրյանը, ով այս տարի «Ոսկե ծիրան» փառատոնի խաղարկային ֆիլմերի ժյուրիի նախագահն է։
Իր հերթին կինոփառատոնի տնօրեն և հիմնադիր Հարություն Խաչատրյանն ասաց, որ Բալայանին բոլորը գիտեն որպես համաշխարհային կինեմատոգրաֆի լավագույն ներկայացուցչի։
«Ոմանք ասում են, որ նա ոչինչ չի նկարել Հայաստանում, սակայն որտեղ էլ նա աշխատել է, ամենուր թողել է հայկական հետք», — ասաց Խաչատրյանը։
Նաթան Արքեպիսկոպոս Հովհաննիսյանը նշեց, որ պարգևն արժանի մարդու է շնորհվել։ Նրա խոսքով` այն վեհությունը, որը բխում է նա արվեստից, արդեն արժանի է այդ պարգևին, քանի որ նրա արվեստն իր մեջ լույս է կրում և պայծառ ապագայի հույս։
Արքեպիսկոպոսը հավելեց, որ Բալայանը մեծ հայ է, օրինակելի մարդ, ով միշտ ձգտում է դեպի լույսը։
Sputnik Արմենիան «Ոսկե ծիրան» կինոփառատոնի տեղեկատվական գործընկերն է:
