ԵՐԵՎԱՆ, 12 հուլիսի — Sputnik. Ավանդաբար փառատոնի երրորդ օրը մեկնարկեց մրցութային ծրագրերի մասնակիցների մամուլի ասուլիսով:
Ալեքսանդր Կոտտի «Ինսայթ» ֆիլմը, որը նկարահանված է ծայրահեղ արտ-հաուսի ժանրում, ներկայացրեց պրոդյուսեր Կատյա Ֆիլիպովան:
«Հայկական համայնապատկեր» մրցութային ծրագրում իր ֆիլմերը լրագրողներին ներկայացրեցին ռեժիսորներ Նարե Մկրտչյանն ու Առնո Խայաջանյանը։
Խաղարկային մրցույթը ներկայացված էր բուլղարացի ռեժիսոր Իգլիկա Տրիֆոնովայի «Դատախազը, դատապաշտպանը, հայրը և որդին» ֆիլմով: Լրագրողների հարցերին պատասխանում էր ֆիլմի գլխավոր հերոսներից մեկին մարմնավորած դերասան Իզուդին Բայրովիչը:
Կեսօրից հետո սկսնակ ռեժիսորները, դերասաններն ու կինոյի սիրահարները շտապեցին ներկա գտնվել սերբ ռեժիսոր Ժիլիմիր Ժիլնիկի վարպետության դասին: Նա մի շարք օգտակար խորհուրդներ տվեց, պատասխանեց հարցերին, ինչպես նաև ներկայացրեց բյուջետային կինո նկարահանելու իր փորձը: Վարպետության դասից հետո Ժիլնիկը վերադարձավ կինոթատրոն, որտեղ մեկնարկել էր իր ֆիլմերի հետհայաց ցուցադրությունը։
Զուգահեռաբար «Դալան» պատկերասրահում բացվեց ականավոր վերջերս մահացած ռեժիսոր Աբաս Քիառոսթամիի «Ճանապարհ» լուսանկարների ցուցահանդեսը։ Գերմանական կինոյի օրվա շրջանակում ցուցադրվեց Աննա Զոհրա Բերախեդի «24 շաբաթ» ֆիլմը:
Հայկական դասական կինոյի սիրահարները «Թումո» ստեղծարար տեխնոլոգիաների կենտրոնում հերթական անգամ դիտեցին Ալբերտ Մկրտչյանի «Ուրախ ավտոբուս» ժապավենը:
Փառատոնի երրորդ օրվա ամենաառանցքային միջոցառումներից էր Ջիվան Ավետիսյանի «Վերջին բնակիչը» ֆիլմի պրեմիերան:
