Լաուրա Սարգսյան, Sputnik.
Ցեղասպանության թեման ընդգրկվել է խաղարկային ֆիլմերի մրցութային ծրագրում։ Ներկայացվող ֆիլմերի թվում է նաև ռեժիսոր Իգլիկա Տրիֆոնովայի «Դատախազը, դատապաշտպանը, հայրը և որդին» ժապավենը, որը նվիրված է Բոսնիայում տեղի ունեցած ցեղասպանությանը։ Որդու դերը ֆիլմում մարմնավորել է հայ դերասան Հովհաննես Թորոսյանը, իսկ հոր դերը` Իզուդին Բայրովիչը։
Չնայած նրան, որ ֆիլմն, ինչպես և վերնագիրը, երկար է, սակայն այն ոչ ոքի անտարբեր չթողեց։
«Ֆիլմը ծանր է, և դրանում դեր խաղալու համար անհրաժեշտ էր մտքի և զգացմունքների անհավանական կենտրոնացում։ Սակայն ամեն ինչ հաջողվեց», — Sputnik Արմենիայի թղթակցի հետ զրույցում ասաց Բայրովիչը։
Նա չի կարող ասել` արդյո՞ք պատահականություն էր, թե կանխամտածված որոշում, որ ֆիլմում որդու դերը մարմնավորել է հենց մարդկության պատմության մեջ առաջին ցեղասպանությունը վերապրած ժողովրդի որդին` ազգությամբ հայ Հովհաննես Թորոսյանը։
Դերասանը խոստովանեց, որ նկարահանումներից դուրս քիչ է շփվել Հովհաննեսի հետ, քանի որ հայերեն չգիտի, իսկ Թորոսյանն անգլերենին չի տիրապետում։ Սակայն դա չէր խանգարում մեզ ջերմ ընկերական հարաբերություններ ունենալ և հասկանալ միմյանց։
«Ի վերջո, նա իմ որդին է», — կատակեց Բայրովիչը։
«Ես շատ բան կցանկանայի արտահայտել, սակայն ինձ խանգարում է լեզվի վատ իմացությունը», — ասաց դերասանը, կանգ առավ մի պահ, գտավ իրեն անհրաժեշտ բառն ու շարունակեց զրույցը։
Բայրովիչը, ով ծնվել է Հարավսլավիայում և ավարտել թատերական ուսումնարանը հեռավոր 80-ականներին, պատմեց, որ իր առաջին դերը ստացել է ուսումնարանն ավարտելուց հետո։ Այս օրվանից էլ սկսվել է նրա դերասանական կարիերան։
«Ես ինձ ավելի շատ համարում եմ թատրոնի դերասան, այդ իսկ պատճառով ավելի շատ ժամանակ եմ անցկացնում բեմում», — ասաց Բայրովիչը։
Նրա խոսքով` ինքն ապրում է իր յուրաքանչյուր դերով, չէ՞ որ հակառակ դեպքում իրեն դերասան չէին կոչի։ Նրա համար անընդունելի է որևէ մեկին կիսատ մարմնավորելը կամ էլ կիսով չափ որևէ մեկը լինելը։
«Մեր մասնագիտությունը բավականին բարդ է, և եթե ես նորից ծնվեի, հավանաբար, լրագրող կդառնայի», — խոստովանեց Բայրովիչը։
Նա բոլորին խորհուրդ տվեց գոնե տարին մեկ լեռներ մագլցել աստղերը դիտելու համար, որոնք անհավանական հանգստություն են ճառագում։
«Բարձրահարկ շենքերը և մեծ քաղաքների վառ լուսավորությունը խանգարում են մեզ դիտել աստղերը», — եզրափակեց դերասանը։
«Ոսկե ծիրան» միջազգային կինոփառատոնը կտևի մինչև հուլիսի 17-ը։ Փառատոնը Երևանում անցկացվում է 2004 թվականից և համարվում է տարածաշրջանում ամենահեղինակավորներից մեկը։
Sputnik Արմենիան «Ոսկե ծիրան» կինոփառատոնի տեղեկատվական հովանավորն է։
