ԵՐԵՎԱՆ, 12 հուլիսի- Sputnik. Մինչև ֆիլմի նկարահանումը ռեժիսորը` Ալեքսանդր Կոտտը, մի շարք հանդիպումներ է ունեցել կույրերի հետ` հասկանալու նրանց հոգեբանությունն ու ապրելակերպը։ Ռեժիսորը չէր կարողացել ժամանել Երևան, նրա փոխարեն ֆիլմի մանրամասները հայտնեց պրոդյուսերը` Կատյա Ֆիլիպովան։
«Առհասարակ կույրերի հետ շփվելը բարդ է։ Դու չգիտես` ինչպես պահել քեզ նման մարդկանց հետ, նախ, որովհետև դրա փորձը չունես, մյուս կողմից` մտածում ես այնքան զգույշ լինես, որ չվիրավորես»,-ասաց պրոդյուսերը։
Այն մարդը, ում կերպարի հիման վրա նկարահանվել է ֆիլմը, կոտրել է բոլոր կարծրատիպերը. շատ շփվող է ու բարդույթներից զուրկ է։ Ինչպես պատմում է ֆիլմի պրոդյուսերը, կույր տղամարդը հաջողակ է կյանքում։
«Երբ առաջին անգամ հանդիպեցի նրա կնոջը, ապշեցի։ Նա մոդել է` բարեկազմ ու գեղեցիկ։ Անցավ ժամանակ ու տեսա նրա երկրորդ կնոջը։ Նա էլ ոչնչով չէր զիջում նախորդին։ Ես անգամ կատակով հարցրի` գուցե գումա՞ր ես տվել այդ կանանց հանդիսավոր միջոցառումներին քեզ ուղեկցելու համար»,- ժպիտով պատմեց Կատյա Ֆիլիպովան։
«Ինսայթ» ֆիլմի կարճ նկարագիրը հետևյալն է. Պավել Զուևը դժբախտ պատահարից հետո կորցնում է տեսողությունը ու արագ անցում է կատարում բոլորովին այլ կյանքի` այս անգամ մթության մեջ։ Երիտասարդ տղամարդը պետք է նորից սովորի ուտել, քայլել, լողանալ։ Փոխվում է նաև այն շրջապատը, որում նախկինում իրեն լավ էր զգում։
Երջանիկ պատահականությամբ Զուևը հանդիպում է Նադեժդային։ Նրա անունը կարծես խորհրդանշական եղավ տղամարդու կյանքում։ Կինն օգնում է նրան գտնել ուժ և իր կյանքի «լուսավոր» կողմերը։
Sputnik Արմենիան «Ոսկե ծիրան» կինոփառատոնի տեղեկատվական հովանավորն է։
