Սերբիայում կայացած օլիմպիական վարկանիշային մրցաշարում հայ ըմբիշն իրեն հատկապես գերազանց դրսևորեց թուրք Սուլեյման Աթլիի հետ գոտեմարտում, որի ժամանակ պարտվում էր 2:6 հաշվով, սակայն հաղթանակի հասավ 10:6 հաշվով: Այդ հաղթանակից հետո Գառնիկը մեծ ոգևորությամբ անցկացրեց նաև կիսաեզրափակիչը, որում հաղթանակը մոլդովացի Անատոլի Բուրույանի նկատմամբ արդեն ապահովեց ուղեգիրը դեպի Բրազիլիա: Հայ մարզիկի հետ զրուցել է Խաչիկ Չախոյանը։
-Գառնի՛կ, ինչպե՞ս կգնահատես քո ելույթները օլիմպիական վարկանիշային մրցաշարում և ի՞նչ դժվարությունների հանդիպեցիր ուղեգիր վաստակելու գործում:
— Դժվարություններ մրցակիցներն են ստեղծում: Երբ հաղթում ես, արդեն կարելի է ասել հաղթահարել ես արգելքները: Մենք շատ մեծ ծանրաբեռնվածությամբ էինք պատրաստվում վարկանիշային մրցումներին: Ինձ հաջողվեց հենց առաջին մրցաշարում ուղեգիր վաստակել, ու միանգամից արդեն ինձ համար սկսվեց նախապատրաստական փուլը:
-Դու թուրք մրցակցին պարտվում էիր 2:6 հաշվով, սակայն հետո մեկ բռնվածքի շնորհիվ կարողացար վաստակել իրար հետևից 8 միավոր ու հաղթել: Հատու՞կ էիր պատրաստվել Աթլիի հետ գոտեմարտին:
— Չեմ կարող ասել, որ հատուկ ինչ-որ բան էի նախապատրաստել թուրք մրցակցիս դեմ, բայց օգտագործեցի նրա վրիպումը ու արդեն կարողացա մի քանի հնարքներ կատարել, որոնք էլ ինձ հաղթանակ բերեցին: Իհարկե, ուզես թե չուզես յուրովի ես մոտենում թուրք ըմբիշների դեմ գոտեմարտերին, սակայն բուն գոտեմարտի ժամանակ դրա մասին չես մտածում: Պարզապես մտածում ես որսալ մրցակցի վրիպումը կամ կոնցենտրացիայի ակնթարթային կորուստն ու հաղթանակի հասնել: Այսինքն` ինչպես բոլոր մրցակիցների հետ գոտեմարտելիս:
-Ի՞նչ է նշանակում օլիմպիական խաղերում հանդես գալը քեզ համար:
— Մինչև վարկանիշ վաստակելը պարզ էր, որ նպատակը օլիմպիական խաղերին մասնակցելու իրավունք վաստակելն էր: Բայց հիմա ավելի մեծ պատասխանատվություն եմ զգում: Մենք ազգ ու երկիր ենք ներկայացնելու օլիմպիական գորգի վրա: Ու չնայած մասնակցելու եմ օլիմպիական խաղերին, դա չեմ անելու օլիմպիական սկզբունքով: Այսինքն` ինձ համար գլխավորը մասնակցությունը չէ, այլ արդյունքի հասնելը: Իսկ թե ինչքանով դա կհաջողվի, արդեն ցույց կտա ժամանակը:
-Քո քաշային կարգում գրեթե բոլորի հետ գոտեմարտել ես: Ի՞նչ հնարավորություններ կան օլիմպիական մեդալ վաստակելու համար:
— Գաղտնիք չէ, որ օլիմպիական խաղերում թույլ մրցակիցներ չեն լինում: Ու պարզ է, որ բոլորն էլ ուզում են մեծ հաջողության հասնել: Բայց գաղտնիք չէ նաև այն, որ յուրաքանչյուր քաշային կագում երեք մեդալ է խաղարկվում: Շատ կարևոր է նախապատրաստական փուլը, ու հավատացեք` մարզիչներն այս պարագայում շատ կարևոր դերակատարում ունեն: Եթե մարզիկը՝ ըմբիշը, կարողացավ ներկայանալ իր լավագույն մարզավիճակում, դա արդեն հաջողության գրավականն է: Ու մարզիչները հենց դրանով են զբաղված մեզ հետ մինչև օլիմպիական խաղերը: Ես հուսով եմ, որ այդ առումով մեզ մոտ ամեն ինչ կարգին է ու, իհարկե, ջանք ու եռանդ չեմ խնայի մեր եռագույնն օլիմպիական խաղերի ընթացքում բարձրացնելու համար:
-Գառնի՛կ, մինչև այժմ դու մեծ հաջողությունների չես հասել, օլիմպիադան այդ առումով կարո՞ղ է լինել բեկումնային:
— Համաձայն եմ, որ աշխարհի կամ Եվրոպայի առաջնություններում չեմպիոն չի հաջողվել դառնալ: Սակայն, ինչպես ասում են, լավ է ուշ, քան երբեք: Այնպես որ օլիմպիական խաղերում ամեն ինչ հնարավոր է, և ես ուզում են դառնալ այդ անակնկալներից մեկը:
