Բերիանիձեն Sputnik Արմենիայի հետ զրույցում ասաց, որ ամեն ինչ անելու է հաղթողների շարքում լինելու համար: Մարզիկի հետ զրուցեց Խաչիկ Չախոյանը։
-Լևան, ի՞նչ տրամադրությամբ ես շարունակում մարզվել Օլիմպիական խաղերից առաջ:
— Ինչ-որ արտասովոր մոտեցում չկա: Ինչպես պատրաստվում ենք խոշոր մյուս մրցումներին, այդպես էլ հիմա պատրաստվում ենք Օլիմպիական խաղերին:
Օլիմպիադային մասնակցելն արդեն իսկ հաջողություն է: Սակայն դրանով բավարարվելը միանշանակ սխալ է: Կանգ առնել պետք չէ: Ու ես իմ ամբողջ կարողությունները ներդնելու եմ` օլիմպիական գորգի վրա մեդալ վաստակելու համար:
-Քո մարզական կարիերայում ամենամեծ հաջողությանը հասել ես 2010 թվականին, երբ աշխարհի առաջնությունում բրոնզե մեդալ վաստակեցիր: Հիմա ինչպե՞ս ես գնահատում քո հնարավորությունները:
— Ինձ համար դժվար է իմ հնարավորություններին գնահատական տալը: Ես, ինչպես և մեր մյուս ըմբիշները, պատրաստվում եմ ըստ նախատեսված ծրագրի: Հետո ոչ ոք էլ չի կարող ասել, թե ինչպիսի ընթացք կունենա մրցաշարը Ռիոյում: Մի բան կարող եմ հաստատ ասել՝ Օլիմպիական խաղերի բոլոր մասնակիցներն էլ ձգտելու են մեդալ վաստակել:
Մի կողմից` օլիմպիական խաղերում մանրուքներ չկան, մյուս կողմից էլ` մանրուքները կարող են վճռորոշ լինել: Շատ բան է կախված նաև վիճակահանությունից: Նայած թե ով կլինի մրցակիցդ նախնական գոտեմարտերում: Չնայած միևնույն է, եթե ուզում ես մեդալ վաստակել, պետք է հաղթես, և վերջ:
-Դու ազգությամբ վրացի ես: Հայաստանի հավաքականի կազմում հանդես գալը այդ առումով քեզ համար ի՞նչ է նշանակում:
— Նշանակում է, որ Հայաստանում մարդիկ ինձ վստահել են, ու ես պետք է արդարացնեմ այդ վստահությունը: Տարբեր հավաքականների կազմում տարբեր ազգի մարզիկներ են հանդես գալիս: Սա արդեն կարծես թե ընդունված մոտեցում է ժամանակակից սպորտում:
-Քո նվաճումը Ռիոյում, բացի անձնականից, ո՞ր երկրի հաջողությունը կհամարես:
— Հայաստանի և Վրաստանի: Ոչ ոք էլ չի կարող մոռանալ իր արմատները: Ես վրացի եմ ու հպարտ եմ, որ ներկայացնում եմ Հայաստանի հավաքականը: Եթե Աստված տա, ու ես կարողանամ կանգնել պատվո պատվանդանին, դա կլինի Հայաստանի ու Վրաստանի մեծ հաղթանակը: Կուրախանան երկու երկրների ժողովուրդները: Դա կլինի իմ հաղթանակի ամենաբարձր ու կարևոր գնահատականը: Ինձ մում է հասնել այդ բաղձալի նպատակին, և ես դրա համար ամեն ինչ կանեմ:
