ԵՐԵՎԱՆ, 10 հուլիսի — Sputnik. Խոզագրիպի ձմեռային բռնկումը Հայաստանում արագ չեզոքացվեց`շնորհիվ ճիշտ մասնագիտական աշխատանքի։ Sputnik Արմենիայի հետ զրույցում ասաց առողջապահության նախարարի տեղակալ Սերգեյ Խաչատրյանը` հավելելով, որ թեև կորուստներից խուսափել չհաջողվեց, բայց դրանք անհամեմատ քիչ էին այլ երկրների համեմատ։
«Մի շարք երկրներում, որտեղ մասնագետները լիաժեք Նոր տարի էին նշել, իսկ երբ հունվարի 10-ից հետո եկել էին աշխատանքի, տեսել էին, որ արդեն անկառավարելի վիճակ է ստեղծվել»,- ասաց Սերգեյ Խաչատրյանը։
Իսկ քանի դեռ մարդկությունը չի գտել բոլոր վարակիչ հիվանդությունների կանխարգելման միջոցները, դրանց բռնկումներն անխուսափելի են։
Մասնագետի համոզմամբ` գրիպի դեմ պատվաստված անձինք անգամ ապահովագրված չեն հիվանդանալուց, բայց այս պարագայում հիվանդությունն անհամեմատ ավելի թեթև ընթացք է ունենում։ «Հակառակ դեպքում հիվանդությունը կընթանա ծայրահեղ ծանր արտահայտություններով ու լուրջ բժշկական օգնության կարիք կունենային այդ մարդիկ, իսկ պատվաստված մարդիկ հիվանդությունը տանում են «ոտքի վրա», առանց դժվարությունների»,- ասաց փոխնախարարը։
Մեր զրուցակցի հավաստմամբ` պատվաստման շնորհիվ Հայաստանում շատ ավելի քիչ տարածում են գտնում տարբեր հիվանդությունները, իսկ դրանց դրական արդյունքը տարեցտարի ավելի է ակնառու է դառնում։ «Վակցինացիան մի մեծ քայլ է դեպի առողջ ապագա»,- ասաց Խաչատրյանը` հիշեցնելով, որ եթե 90- ական թվականներին խնդիր դրվեց հիմնական բուժօգնությունը տեղափոխել ամբուլատոր-պոլիկլինիկական ծառայություններ և միայն շատ քիչ բեռ թողնել հիվանդանոցների վրա, ապա համաշխարհային առողջապահությունն այսօր մեկ այլ մեթոդ է առաջարկում, որի հիմքում պատվաստումն է։
«Հայաստանում գոյություն ունեն 25 ինֆեկցիաների դեմ վակցինաներ։ Մենք լիարժեք մասնակցում ենք այս ամենին, և վերջին հավաքում շատ ակտիվորեն քննարկվեց, օրինակ, մալարիայի պատվաստանյութի հարցը, որովհետև գիտական ուսումնասիրությունները ցույց են տվել, որ այն ընդամենը 39 տոկոսի արդյունավետություն ունի, բայց այդ 39 տոկոսը, երբ հաշվարկում ենք, թե որքան մարդու կյանք կփրկվի, այն արդեն բավական լուրջ թիվ է կազմում»,-նշեց Սերգեյ Խաչատրյանը։
«Ինչո՞ւ են մանկահասակ երեխաներին պատվաստում մի քանի պատվաստանյութերից բաղկացած փնջերով, և որքանո՞վ է դա անվտանգ երեխաների համար» հարցին առողջապահության փոխնախարարը պատասխանեց, որ բոլոր պատվաստանյութերը մանրամասն ուսումնասիրվում են և նոր միայն հասնում բնակչությանը։ «Այդ փնջերը գիտականորեն հիմնավորված մոտեցման արդյունքներ են, որոնցից վախենալու հարկ չկա։ Մեր մասնագետները բավականաչափ կրթված են, ունեն մասնագիտական կարողություններ ու ընդունակություններ` յուրաքանչյուր երեխային անհատապես գնահատելու»,- ասաց նա` հավելելով, որ հենց այնպես որևէ պատվաստում չի կատարվում։
Նախապես բժիշկն անցկացնում է կոնսուլտացիա, ապա կայացնում որոշում։ Պատվաստումը պետք է լինի շարունակական, հաստատված ժամկետներին համապատասխան, իսկ պատվաստանյութի արտադրման երկիրը որևէ կապ չունի դրա որակի հետ, բայց քաղաքացիների բացասական մոտեցումները հաշվի առնելով` նախարարությունը ներկրում է ավելի հայտնի արտադրողների արտադրանքը` երբեմն նաև ավելի թանկ վճարելով դրա դիմաց։
Հայաստանում մանկական մահացության ցուցանիշի ցածր լինելը առողջապահության նախարարը վերագրում է հենց իմունիզացման ու վակցինացման ազգային ծրագրի իրականացմանը։ Այս բնագավառում մեր երկիրը մեծ հաջողությունների է հասել, ինչը, ՀՀ առողջապահության նախարարի խոսքով, ընդունում են նաև միջազգային կառույցները։
