ԵՐԵՎԱՆ, 28 մայիսի — Sputnik. Նախապես բժշկության այս տեսակը նախատեսված է եղել տիեզերագնացներին երկրից բուժօգնություն ցույց տալու համար, իսկ առաջին հեռակա վիրահատությունը կատարվել է 2001թ.-ին, երբ հեռակառավարվող ռոբոտի միջոցով Նյու Յորքում գտնվող բժիշկը վիրահատել է Ստրասբուրգում գտնվող հիվանդին։
Հայաստանում բժշկության այս ճյուղը կիրառվում է հիմնականում հեռահաղորդակցային խորհրդատվությունների տեսքով, բայց կա նաև վիրահատությունների փորձ։
«Մասնագետներն այստեղ վիրահատում են, բայց երբեմն նրանց ուղղորդում են արտերկրի ավելի մեծ փորձ ունեցող, ավելի հմուտ գործընկերները։ Սա շատ ավելի է բարձրացնում վիրահատության արդյունավետությունը»,- ասաց Տելեբժշկության հայկական ասոցիացիայի տեխնիկական տնօրեն, բժիշկ-վիրաբույժ Ալեքսանդր Հարոյանը։
Հայաստանում հեռաբժշկության փորձնական ծրագիր է իրականացվել նաև Սպիտակի տարածաշրջանի Ջրաշեն գյուղի և Ստեփանակերտի հիվանդանոցների հետ։ Երևանում գտնվող առաջատար մասնագետը հեռակապի միջոցով զրուցել է վերոհիշյալ կլինիկաներում գտնվող հիվանդի հետ, ստացել նրա հիվանդության մասին տեղեկություններ ու բուժում նշանակել։
«Այս դեպքում հիվանդը ստիպված չի լինում բժշկի կոնսուլտացիայի համար գալ, հասնել Երևան, բացառությամբ այն դեպքերի, երբ անհրաժեշտ է լինում լրացուցիչ հետազոտություն նշանակել»,- նշեց բժիշկը` հավելելով, որ հեռակա խորհրդատվություն անցած հիվանդների կեսից ավելին մայրաքաղաք հասնելու կարիք այլևս չի ունեցել։
Հայաստանում փորձարկվել է նաև զարգացած երկրներում տարածում գտած մեկ այլ հեռաբժշկության մեթոդ, երբ հիվանդի մարմնի վրա տեղադրված հաղորդիչ սարքերը հիվանդի առողջական վիճակի մասին օպերատիվ տվյալներ են փոխանցում բժշկին։ Վտանգի դեպքում հիվանդը բջջային կապի միջոցով զգուշացվում է, թե ինչ միջոցներ պետք է ձեռնարկի կամ որ պետք է շտապ այցելի բժշկին։
