ԵՐԵՎԱՆ, 6 հուլիսի — Sputnik. ԱԺ պատգամավոր Շիրակ Թորոսյանը կարծում է, որ հայ-ռուսական Հակաօդային պաշտպանության համակարգը (ՀՕՊ) կապ չունի Հայաստանի ՀՕՊ համակարգի հետ. այն ուղղված է բացառապես ՀՀ արևմտյան սահմանի պաշտպանությանը, իսկ Ադրբեջանի հետ պայքարելու համար Հայաստանն ունի իր սեփական ՀՕՊ համակարգը։
«Երկու ուղղաթիռ է բարձրացրել, երկուսն էլ ոչնչացվել են, և 14 —ից ավելի ԱԹՍ-ներ են խոցվել, որոնք նորություն են ու դժվարություն են մեզ համար։ Իսկ այս նոր համակարգը մեզ համար շատ կարևոր է, քանի որ կոնկրետ ուղղված է Թուրքիայի դեմ և Թուրքիայի սահմանի հետ լրացուցիչ խնդիր է լուծում»,- պարզաբանում է Շիրակ Թորոսյանը։
Պատգամավորը խորհուրդ է տալիս Ռուսաստանի հետ կնքված համաձայնագիրը դիտարկել մեր հարևան Թուրքիայի` ՆԱՏՕ-ի հզորությամբ երկրորդ երկիրը լինելու տեսանկյունից և չվերագրել այն ադրբեջանական սպառնալիքի դեմ պայքարին։
ՀՀ պաշտպանության նախկին նախարար Վաղարշակ Հարությունյանը քաղաքական ասպարեզում արծարծվող այս հարցն «արհեստական» է համարում` ինքն էլ իր կողմից մեկ այլ հռետորական հարց հնչեցնելով. «Իսկ Հայաստանը Լեռնային Ղարաբաղը ճանաչե՞լ է»։ Հենց այս գործոնն է խոչընդոտում, որ Հայաստանի հետ կնքված պայմանագիրն ինչ-որ կերպ տարածվի նաև Ղարաբաղի վրա։ Այդուհանդերձ, Վաղարշակ Հարությունյանը համոզմամբ` Հայաստանի օդային տարածության ամրապնդումը չի կարող դրական ազդեցություն չունենալ նաև ԼՂ-ի վրա։
«Եթե ավելանում են միջոցները, որոնք ուժեղացնում են մեր ՀՕՊ-ը, իսկ դա Ս-300 համակարգն է ու 20 նոր ինքնաթիռները, ապա մեր միջոցները, որոնք մենք պետք է կիրառեինք մեր անվտանգության համար, արդեն ազատվում են, և մենք կարող ենք դրանք ուղղել այն ուղղությամբ, որտեղից սպառնալիք կա»,- ասում է Վաղարշակ Հարությունյանը։
Բացի այդ, նախկին նախարարի խոսքով` նորագույն միջոցները հնարավորություն են տալիս ԼՂ-ի օդային տարածքը պաշտպանել հենց Հայաստանից։ «Մենք ԼՂ անվտանգության երաշխավորն ենք, և դա ռազմական մարտավարության խնդիր է, որի հնարավորությունը մենք ունենք և անում ենք»,- ասաց նա։
Իսկ մտավախությունները, թե ադրբեջանական օդուժի հարձակման պարագայում Հայաստանը զրկվում է Ղարաբաղին օգնության հասնելու իրավունքից ու հնարավորությունից, պաշտպանության նախկին նախարարն արհեստածին և անհիմն է համարում։
