ԵՐԵՎԱՆ, 30 հունիսի — Sputnik, Արման Վանեսքեհյան. ՀՀ պաշտպանության նախարարության ՀՕՊ վարչությունը ստեղծվել է 1992 թվականին։ Այն ժամանակ հայկական բանակին խիստ անհրաժեշտ էին ՀՕՊ մասնագետներ։
Միաժամանակ 1992թ. պլանավորվեց և իրագործվեց նախկինում ՀՕՊ զորքերում ծառայած պահեստայինների զորակոչը։ Զորակոչվեց 400 սպա և ենթասպա։ Հենց այդ կազմն էլ դարձավ Հայաստանի Հանրապետության ՀՕՊ ժամանակակից ուժերի հիմքը։
1995 թվականից ՀՀ ՊՆ համապատասխան հակաօդային ծառայությունները սկսեցին հերթապահություն իրականացնել արդեն միավորված ԱՊՀ ԶՈԻ ՀՕՊ կազմում։
2005 թվականից ՀՕՊ զորքերը համապատասխան մասնագետներով համալրելու նպատակով ՀՀ Ռազմական ավիացիոն ինստիտուտում ստեղծվեց ՀՕՊ ֆակուլտետ, և սկսեցին մասնագետներ պատրաստել ՀՀ տարածքում։ Այդ ֆակուլտետն է հենց հիմնականում ապահովում ՀՕՊ հանրապետական ուժերը պրոֆեսիոնալ կադրերով։ Այդ մասնագետներն, օրինակ, 2015 թվականի սեպտեմբերին ՌԴ «Աշուլուկ» «Մարտական ընկերակցություն-2015» մարտական հրաձգությամբ զորավարժության ժամանակ գերազանց կատարեցին իրենց առջև դրված խնդիրները:
Ռուսաստանի և Հայաստանի միջև 2015 թվականին ստորագրված ՀՕՊ միավորված տարածաշրջանային համակարգերի ստեղծման մասին պայմանագիրը ենթադրում է, որ Կովկասյան տարածաշրջանում գործելու է հավաքական անվտանգության համակարգ։ Այդ համակարգի ներուժն ու կարողությունները մի քանի անգամ գերազանցում են տարածաշրջանի երկրների առանձին ՀՕՊ համակարգերի հնարավորությունները։
Ժամանակակից միավորված համալիրը ներառում է ինչպես փոքր, միջին և մեծ հեռավորություններում օդային թիրախների խոցման համակարգեր, այնպես էլ այդ համակարգերի փոխգործակցություն ռազմական ավիացիայի հետ, որի մի մասը գտնվում է Հայաստանի, իսկ մյուս մասը` Ռուսաստանի Դաշնության տարածքում։
Եվ այս ամենը, ինչպես նաև տեսահսկման համակարգերը, գտնվելու է ռազմական օղակների ենթակայության տակ, որոնք անմիջականորեն ղեկավարվելու են Հայաստանում տեղակայված հրամանատարական կետերի կողմից։
