ԵՐԵՎԱՆ, 6 հուլիսի — Sputnik. Հուլիսի 6-ին` ժամը 10.05-ին ահազանգ է ստացվել, որ Սյունիքի մարզի Կարմրաքար գյուղի մոտակայքում բեռնատար ավտոմեքենան շրջվել է, կան տուժածներ, հայտնում են ԱԻՆ-ից։
Դեպքի վայր է մեկնել մեկ մարտական հաշվարկ և մարզային փրկարարական վարչության օպերատիվ խումբը:
Ինչպես հայտնում է shamshyan-ը, վթարի հետևանքով 15 անձինք տարբեր աստիճանի մարմնական վնասվածքներով տեղափոխվել են Կապանի բժշկական կենտրոն: Բոլոր վիրավորները ժամկետային զինծառայողներ են:
Կապանի բժշկական կենտրոնից հայտնել են, որ վիրավորների կյանքին և առողջությանը վտանգ չի սպառնում:
Ռազմական ոստիկանությունն ու կայազորի քննչական բաժինը պարզում են վարորդի և վիրավորների ինքնությունը:
