ԵՐԵՎԱՆ, 30 հունիսի — Sputnik. Կառավարությունը հավանություն տվեց ՀՀ 2016 թվականի պետական բյուջեով նախատեսված կառավարության պահուստային ֆոնդից 9 ամսվա ընթացքում Շիրակի մարզպետարանին գումար հատկացնելու մասին նախագծին։
Ջրհեղեղից տուժած Արթիկի ամեն ընտանիքի տրվելու է 4 միլիոն 600 հազար դրամ։
«Ջրհեղեղի հետևանքով ընկած կենդանիների, մշակաբույսերի ցանքատարածություններին պատճառված վնասի դիմաց յուրաքանչյուր ընտանիքի կփոխհատուցվի համապատասխանաբար 650 հազար և 1 միլիոն 700 հազար դրամ»,-ասաց Դավիթ Լոքյանը։
Նրա վստահեցմամբ` այս պահին Արթիկում կյանքն ընթանում է բնականոն հունով։ Դադարել է ջրի հոսքը, վերականգնված է գազիֆիկացումը, բացառությամբ 8-10 շենքի։
«Միայն փոքր տարածքում ջուր չկա։ Ռետինե խողովակների միջոցով քաղաքապետարանը լուծել է այդ տարածքի բնակիչների ջրի հարցը»,- նշեց նախարարը։
Վարչապետ Հովիկ Աբրահամյանը մի նկատառում արեց, որ արված աշխատանքների մասին ամեն օր պետք է զեկուցել հանրությանը։
«Աղետի օրն ամբողջ ժամանակ եղել եմ այնտեղ։ Հիմա պիտի ամբողջը հայտարարե՞նք, թե ինչ ենք անում»,- ընդդիմացավ Լոքյանը։
Կառավարության նիստից հետո արտակարգ իրավիճակների նախարար Արմեն Երիցյանն ասաց, որ աղետի օրը վարչապետի հետ եղել է Արթիկում։ Համապատասխան գնահատականներ են տրվել ակտիվ աշխատանքներ իրականացնելու համար։
Հունիսի 24-ին Շիրակի մարզի Արթիկ քաղաքում սելավատարերի խցանման հետևանքով ջրալցվել են քաղաքի գլխավոր փողոցները։ Ըստ պաշտոնական տեղեկատվության՝ ջրալցված հատվածներում ջրի մակարդակը հասել է մոտ 40 սմ-ի։ Հեղեղը մեծ վնասներ է պատճառել բնակչությանը՝ տակնուվրա անելով տները, գոմերը, ինչի հետևանքով սատկել են մեծ թվով խոշոր եղջերավոր անասուններ, խոզեր, տնային կենդանիներ։ Ջրում եղած քարերը վնասել են մարդկանց ավտոմեքենաները։ Ջրալցվել են նաև Արթիկի թիվ 2 մանկապարտեզը, որտեղից փրկարարները դուրս են բերել թվով 70 երեխայի և 23 աշխատակցի։
