ԵՐԵՎԱՆ, 3 հուլիսի — Sputnik, Անի Լիպարիտյան. Այս վառ և ուրախ տոնը, որը մաքրում և վերափոխում է խորհրդանշում, ոչ միայն ուրախ ժամանց է երեխաների համար, այլև հաճախ վերածվում է ագրեսիայի և բարբարոսության:
Սահմաններ չճանաչող դեռահասները դույլերով դուրս են գալիս հերթական «զոհին» որոնելու: Հատկապես դա հատուկ է մայրաքաղաքի ծայրամասերի բնակիչներին։
Մեր տան մոտ առավոտից դույլերով մի խումբ երեխաներ են կանգնած (նրանք իրենց դույլերը պարբերաբար լցնում են ցայտաղբյուներից): Աղջիկներից մեկը` ամենաբարձր ձայն ունեցողը, մյուսներին հրահանգում է` ջրեեեեեեեք:
Ինչից հետո երեխաները հարձակվում են անցորդի վրա և ոտքից գլուխ ջրում նրան: Բայց չէ՞ որ մարդը կարող է վատառողջ լինել, հատկապես եթե ծեր մարդ է, և սառը ջրով «ցնցուղ ընդունելը» կարող է վատ հետևանքներ ունենալ:
Ամեն ինչ չափի մեջ է գեղեցիկ։ Նման խաղերը երեխաների մեջ ագրեսիա են առաջացնում, նրանք սկսում են նեղացնել իրենցից փոքրերին: Ցանկալի կլիներ ավելի բարեկիրթ մոտեցում ցուցաբերել այս տոնի նկատմամբ, որպեսզի նրանք, ովքեր չեն մասնակցում տոնին, չբարկանան տոնը վայելողների վրա:
Հատկապես այս օրը խնդիրներ է առաջացնում հասարակական տրանսպորտի վարորդների համար, քանի որ ոմանք, իրենց կորցրած, սկսում են ջրել երթուղային տաքսիներն ու հասարակական տրանսպարտի այլ միջոցները: Տաքսու վարորդներից մեկը, ում ավոտմեքենայի սրահն ամբողջությամբ թաց էր, հայհոյելով վազում էր մեղավորի հետևից:
Մեկ այլ տաքսու վարորդ բողոքում էր դիսպետչերին, որ ավտոմեքենայի մեջ երեք դույլ ջուր են լցրել:
«Մենք ավտոմեքենայի մեջ չորսով էինք, և բոլորս ոտքից գլուխ ջրի մեջ կորած», — ասում էր նա:
Դիսպետչերը խնդրեց վարորդին փակել բոլոր պատուհանները:
Ցանկալի կլիներ, որ Վարդավառը մնար գեղեցիկ և պայծառ քրիստոնեական մի տոն, որում թեև առկա են հին հեթանոսական տարրեր, սակայն դրանք չեն վերածվում բարբարոսության:
Երևանի բոլոր 12 վարչական շրջաններում այսօր տոնական միջոցառումներ էին կազմակերպվել, որոնք ուղեկցվում էին երգ ու պարով: Անակնկալներից էր նաև ջրցան մեքենաների շքերթը:
