ԵՐԵՎԱՆ, 2 հուլիսի — Sputnik, Գոհար Սարգսյան. Արզնու օդանավակայանում հաճելի իրարանցում է. մրցույթի մասնակիցներին մի քանի րոպե է մնացել սարքերը կարգի բերելու և մցույթին պատշաճ ներկայանալու համար: Նրանց քաջալերելու են եկել ինչպես ընկերներն ու հարազատները, այնպես էլ անօդաչու սարքերով հետաքրքրված մարդիկ:
Ապրիլյան քառօրյա պատերազմի ժամանակ շատերն առաջին անգամ լսեցին անօդաչու թռչող սարքերի մասին, ու հիմա եկել են սեփական աչքերով տեսնելու դրանք։
«Ապրիլին լսեցի, որ մեր զինվորները թշնամու անօդաչու սարքեր են կործանել: Ես պատկերացնում էի աղմկոտ ու շատ վախենալու սարքեր: Հիմա տեսա, որ դրանք այնքան էլ վախենալու չեն: Մեր տղեքն ավելի լավը կարող են ստեղծել»,- ասաց մրցույթը դիտել ցանկացողներից մեկը:
Մրցույթի մեկնարկը տրվեց. «Անօդաչու թռչող սարքեր» մրցույթի մասնակիցներից պահանջվեց սարքերն ուղղորդել դեպի նպատակակետ, այնտեղ թողնել ինչ-որ առարկա ու հետ վերադառնալ: Թռչող սարքերի թիրախը 5 մ տրամագծով շրջան է, որի վրա կան գծեր ու նշաններ: Հենց այդտեղ էլ պետք է թռչող ռոբոտները գցեն հանձնարարված բեռը:
Արմեն Վարդանյանն արդեն մի քանի տարի զբաղվում է ռոբոտաշինությամբ, նաև ավիամոդելներ է գծագրում: Sputnik Արմենիայի հետ զրույցում պատմեց, որ իրենց ստեղծած թռչող սարքի առանձնահատկությունն այն է, որ այն հնարավոր է կառավարել աշխարհի ցանկացած կետից: Այլ կերպ ասած՝ նա կարող է գտնվել Նյու Յորքում, իսկ ռոբոտը՝ Հայաստանում, և օվկիանոսից այն կողմ գտնվելով` կարող է անօդաչու սարքին առաջադրանք տալ:
«Համակարգիչ կա վրան դրված: Բջջային ցանցի միջոցով կառավարվում է, ոչ մի այլ տիպի ռադիոցանց չկա: Դա հնարավորություն է տալիս դրոնն օգտագործել աշխարհի ցանկացած կետում, որտեղ կա 3 կամ 4G ծածկույթ: Սարքը թռչում է կոորդինատային քարտեզով: Սարքը կարող է օգտագործվել հետախուզական նպատակներով»,- ասաց Վարդանյանը:
Նրա խոսքով՝ նման սարքն ամբողջ աշխարհում նորարարություն է: Վարդանյանը նշեց, որ իրենք համագործակցում են պաշտպանության նախարարության հետ, և դա ցանկալի պտուղներ է տալիս:
Անօդաչու թռչող սարքի մի օրինակ էլ ստեղծել է Կարենը: Նա նշեց, որ իրենց սարքի հիմնական գործառույթը նռնակը մի կետից մյուսը տեղափոխելն ու նետելն է:
«Ճկունության տեսանկյունից կատարյալ չէ, քանի որ քաշն էլ թեթև չէ»,-ավելացրեց նա:
«Անօդաչու թռչող սարքեր» մրցույթի եզրափակիչ է դուրս եկել 10 մասնակից: Հաղթող եռյակին կշնորհվի 600, 400 և 260 հազար դրամ պարգև:
