ԵՐԵՎԱՆ, 1 հուլիսի — Sputnik. 2016 թվականի հուլիսի 9-ից 10-ը Վահագնի թաղամասի Արարատ գոլֆ ակումբում կանցկացվի երկրորդ Կովկասի գավաթ մրցաշարը, կմրցեն Հայաստանի և Վրաստանի թիմերը։ Այս մասին Sputnik Արմենիային ասաց Հայաստանի Ազգային գոլֆի ասոցիացիայի նախագահ Կարեն Հովհաննիսյանը։
«Մենք անհամբերությամբ ենք սպասում Վրաստանից ժամանող հյուրերին։ Կովկասի գավաթը շատ կարևոր նախաձեռնություն է, որը նպաստում է գոլֆի տարածմանը Հայաստանում և Վրաստանում։ Հիանալի առիթ է տարածաշրջանում այդ մարզաձևի զարգացմանը նոր թափ հաղորդելու համար», — ասաց Հովհաննիսյանը։
Նրա խոսքով` Վրաստանի գոլֆի ֆեդերացիայի ներկայացուցիչները ներկա կլինեն բացման արարողությանը, որի ընթացքում երկու երկրի ներկայացուցիչները տարածաշրջանում այդ մարզաձևի տարածմանն ու զարգացմանը ուղղված համաձայնագիր կստորագրեն։
«Ինչպես անցած տարի, յուրաքանչյուր թիմում կլինի 8 հոգի։ Ընդհանուր առմամբ մենք երկու օրվա ընթացքում կանցկացնենք 16 խաղ։ Գավաթը կստանա ամենաշատ միավորներ վաստակած թիմը, որը պատվավոր մրցանակը կպահի մինչև հաջորդ տարի»,- նշեց նա։
Կովկասի գավաթի անցկացման գաղափարը ծագել է 2014թ-ին։ Առաջին մրցաշարն անցկացվել է Վրաստանում, Ambassadori գոլֆ ակումբում։
