ԵՐԵՎԱՆ, 19 մարտի- Sputnik, Անի Լիպարիտյան. Անգլիացի զբոսաշրջիկները ճանապարհորդել են Հայաստանի քաղաքներով և գյուղերով ու ոգևորվել Տաթևի վանական համալիրի մոտ գոլֆ խաղալու գաղափարով:
Նրանք դիմել էին Հայաստանի գոլֆիա սոցիացիայի գլխավոր քարտուղար Կարեն Հովհաննիսյանին՝ այս հարցում օգնություն ստանալու համար:
«Տղաներն ինձանից մականներ և գնդակներ խնդրեցին: Ես համաձայնեցի տալ միայն մի պայմանով, եթե լուսանկարեն և ինձ ուղարկեն այն, ինչ պատրաստվում են անել»,- Sputnik Արմենիային ասաց Կարեն Հովհաննիսյանը:
«Նրանք ուրախությամբ վերցրին մականները, գնդակները և գնացին լեռներ: Արտասահմանցիները պահեցին իրենց խոստումը և ինձ ցույց տվեցինլուսանկարը, թե ինչպես են լեռներում ու կիրճերում գոլֆ խաղում: Անկեղծ ասած՝ ես զարմացա»,- պատմեց Կարենը:
Հնագույն խաղը Հայաստանում
Ինչպես բացատրեց Sputnik Արմենիայի զրուցակիցը, իրականում քչերը գիտեն այն մասին, որ Հայաստանում գոլֆ են խաղում և այստեղ գոլֆի դաշտ կա: Չէ՞ որ գոլֆի դաշտի առկայությունը լավ ցուցանիշ է երկրի համար:
Կարծիք կա, որ գոլգը հարուստների խաղ է: Սակայն Կարենը նշեց, որ այսօր գոլֆ խաղալու համար մեծ հնարավորություններ և գումարներ պետք չեն:
«Գլխավորը ցանկությունն է: Խաղում ես բաց դաշտում և միաժամանակ շփվում ես գործընկերներիդ, ընկերներիդ հետ կամ էլ նոր ծանոթություններ ես ձեռք բերում: Դա իսկապես բարձրացնում է տրամադրությունդ»,- ասաց Կարենը:
Հովհաննիսյանի խոսքով՝ գոլֆ խաղալու ժամանակ են կնքվում ամենակարևոր համաձայնագրերը, քանի որ խաղը թույլ է տալիս ավելի լավ ճանաչել միմյանց:
Նրա խոսքով՝ գոլֆը տարբերվում է մյուս մարզաձևերից նրանով, որ այս խաղը ողջ կյանքի համար է: Հայաստանում գոլֆի ակումբ ստեղծելու գաղափարի հեղինակը ԱՄՆ-ի ամենահարուստ հայերից մեկն է՝ բարերար Վահագն Հովնանյանը, ով մինչև կյանքի վերջ գոլֆ է խաղացել:
«Հայաստանում տարեցտարի աճում է գոլֆի նկատմամբ հետաքրքրությունը, այս հարցում իրենց դերն են խաղում նաև արտասահմանյան երկրների հետ ունեցած սերտ կապերը: Ես գոլֆը կատակով անվանում եմ գործարարների «ֆեսյբուք»»,- ասաց Կարենը:
Թեև Հայաստանում անվանի գոլֆիստներ չկան, սակայն երկրի սահմաններից դուրս կան հայեր, ովքեր հրաշալի տիրապետում են այս խաղի հիմտություններին:
«Մենք մեծ հույսեր ենք կապում Անի Գուլուգյանի հետ: Նա պրոֆեսիոնալ գոլֆիստ է, ապրում է ԱՄՆ-ում: Այժմ մենք երկու ուղղություն ունենք. հիմա պատրաստում ենք սեփական մարզիկներին, բայց դրա հետ մեկտեղ ուզում ենք համագործակցել արտասահմանում բնակվող հայազգի գոլֆիստների հետ»,- ասաց Հովհաննիսյանը:
Հայ գոլֆիստները պատրաստվում են տարբեր առաջնությունների մասնակցել:
Գոլֆն իդեալական խաղ է հայերի համար
Գոլֆ ակումբի և ասոցիացիայի ներկայացուցիչների հետ հանդիպմանը օրը մառախլապատ էր, քամոտ, ցուրտ էր ու թույլ անձրև էր տեղում:
«Արարատ» գոլֆ ակումբի տեղի ընտրությունը պատահական չի եղել: Այն գտնվում է Երևանի արվարձանում՝ Վահագնի թաղամասի տարածքում, որը նույնպես կառուցել է Վահագն Հովնանյանը: Հատկապես պարզ եղանակին հրաշալի երևում է Արարատ լեռը, ու խաղացողներից յուրաքանչյուրի գնդակն ուղղվում է դեպի պատմական լեռը:
Այս մասին Sputnik Արմենիային պատմեց Հովնանյանի աղջիկը՝ Նինան, ով հոր մահից հետո դարձել է ակումբի նախագահը:
«Այստեղ սկզբում ամայի տարածություն էր… Երբ հայրս սկսեց այս թաղամասի շինարարական աշխատանքները, հասկանում էր, որ կմնա Հայաստանում: Այդ ժամանակ նա ասաց՝ անկասկած գոլֆ է պետք: Նա կառուցում էր այս դաշտը և երազում, որ Հայաստանը գոլֆի երկիր դառնա: Միշտ խաղում էր մի նպատակով՝ հասնել Արարատի բարձունքին»,- պատմեց Նինան:
Նա կատակով նշեց, որ լավ կլիներ գոլֆ խաղալ հենց լեռան վրա, քանի որ այնտեղ լավ լանջեր կան:
Նինան պատմեց, որ գոլֆի դաշտը մշտական հոգածության կարիք ունի, դաշտը խնամելու համար նաև մեծ գումարներ են պետք, իսկ որակյալ խոտով պրոֆեսիոնալ դաշտ ստեղծելու համար էլ ժամանակ է պետք:
Սակայն որոշ գոլֆիստներ պնդում են, որ ճիշտ դաշտը պետք է այնպիսին լինի, ինչպիսին Հայաստանում է, քանի որ Շոտլանդիայում ի սկզբանե խաղացել են հենց այսպիսի դաշտերում: Շոտլանդացիների մոտ հաճախ դաշտերով զբաղվում են ոչ թե մարդիկ, այլ ոչխարները, որոնք արածում են դաշտերում: Բայց մեզ համար դժվար կլինի ոչխարներ պահելը, թեև դա շատ գեղեցիկ ու ներդաշնակ կդիտվեր»,- ասաց Sputnik Արմենիայի զրուցակիցը:
Նինան հայտնեց, որ Հայաստանում գոլֆիստների դպրոց է բացվել երեխաների համար:
«Պատրաստվում ենք գոլֆիստների սերունդ պատրաստել, չէ՞ որ Հայաստանն իդեալական վայր է գոլֆի համար: Բացի այդ, այս խաղը նպաստում է նյարդային համակարգի թուլացմանը և թույլ է տալիս ներդաշնակության հասնել: Մարդը խաղում է բնության գրկում, դրանից լավ ուրիծ ի՞նչ կարող է լինել»,- ասաց նա:
Կարևոր է նաև այն փաստը, որ գոլֆն անհատական մարզաձև է, իսկ հայերը կարողանում են գերազանց արդյունքի հասնել հատկապես անհատական մարզաձևերում:
«Հայերն այդքան էլ լավ հանդես չեն գալիս թիմային մարզաձևերում, նրանք սիրում են միայնակ մրցել միմյանց հետ: Այդ առումով գոլֆն իդեալական սպորտ է հայերի համար: Մենք ուզում ենք նաև համաձայնագիր կնքել մայրաքաղաքի տարբեր դպրոցների հետ, որպեսզի երեխաներն այցելեն մեր դպրոց և գոլֆ խաղալ սովորեն»,- ասաց Նինա Հովնանյանը:
Գոլֆի սիրահարները պատրաստվում են Հայաստանում նոր հարթակներ կառուցել հին խաղի համար: Նրանք համոզված են, որ գոլֆի դաշտերը կավելացնեն զբոսաշրջային Հայաստանի գրավչությունը:
