ԵՐԵՎԱՆ, 1 հուլիսի — Sputnik. Ռուսաստանի արտակարգ իրավիճակների նախարարության ինքնաթիռը ևս 50 մարդու տեղափոխեց Հայաստան։ Այս մասին հայտնում է նախարարության մամուլի ծառայությունը։
«Ռուսաստանի ԱԻՆ-ի Ան-148 ինքնաթիռը Հայաստանի ևս 50 քաղաքացու Բեսլան քաղաքից բարեհաջող տեղափոխեց Երևան»,- հայտնում է գերատեսչությունը։
Սա Ռուսաստանի ԱԻՆ-ի ավիացիայի 5-րդ չվերթն է։ Հատուկ չվերթերով Հայաստան է տեղափոխվել 246 քաղաքացի, այդ թվում` 31 երեխա։
Հունիսի 23-ին Վրաստանում գրանցված սելավի հետևանքով փակվել է Ռազմավրացական ճանապարհը, որտեղ կուտակված մարդկանց տարհանումն իրականացվել է Ռուսաստանի և Հայաստանի կառավարությունների միջև կնքված համաձայնագրի շրջանակում։ Բնական աղետի պատճառով այդ ճանապարհահատվածում ավելի քան 200 բեռնատար և 40 մարդատար մեքենա է կուտակվել։
Խցանման վայրում աշխատում են Ռուսաստանի ԱԻՆ-ի հոգեբանները, տեղադրվել են ճանապարհային ոստիկանության և Բժշկական աղետների կենտրոնի շարժական կետեր, որոնք տաք սնունդ և խմելու ջուր են ապահովում։ Ռուսաստանի ԱԻՆ-ի գլխավոր վարչությունը կենսապահովման թաղամասեր է տեղադրել, որտեղ մարդիկ կարող են հանգստանալ, սնվել, բժշկական օգնություն ստանալ և լիցքավորել բջջային հեռախոսները։
