ԵՐԵՎԱՆ, 1 հուլիսի — Sputnik. Հարավային Օսեթիայի նախագահի մամուլի քարտուղար Գանա Յանովսկայան հայտարարել է, որ Հարավային Օսեթիայի ղեկավարությունը հայկական բեռնատար ավտոմեքենաներն անցկացնելու վերաբերյալ հարցում չի ստացել Հայաստանից։
Ռազմավրացական ճանապարհին տեղի ունեցած միջադեպից հետո Հայաստանն այլընտրանքային ուղիներ է փնտրում բեռները Ռուսաստան հասցնելու համար։ Հայաստանի տրանսպորտի և կապի նախարար Գագիկ Բեգլարյանն ավելի վաղ հայտնել էր, որ տարանցիկ երկիր է դիտարկվում Հարավային Օսեթիան։
«Մեզ ոչ ոք նման հարցով չի դիմել», —հայտնել է նախագահի մամուլի քարտուղարը։
Ռուսաստանի սահմանին` Ստեփանծմինդա-Լարս Ռազմավրացական ավտոճանապարհի հատվածում, տեղակայված է «Վերին Լարս» անցակետը, որը Հայաստանի և Ռուսաստանի միջև առկա միակ ցամաքային ճանապարհն է և կարևոր նշանակություն ունի տնտեսական կապերի առումով։
Հունիսի 23-ից այս ուղղությունը փակ է քարաթափության և սելավների պատճառով։
«Վերին Լարս» անցակետի փակվելու պատճառով ճանապարհին էր մնացել ՀՀ ավելի քան 200 քաղաքացի։ Քաղաքացիների տեղափոխումը Երևան ապահովել է Ռուսաստանի արտակարգ իրավիճակների նախարարությունը։
