Անի Լիպարիտյան, Sputnik.
Վերջին մի քանի օրերին շատ շոգ էր ոչ միայն Հայաստանում, այլև, օրինակ, Ռուսաստանում։ Մոսկվան «եռում էր» մի քանի օր, և բոլորին հայտնի է, որ մոսկովյան տապն անմարդկային է։
Մարդիկ թաքնվում էին հովանոցների տակ, շատ ջուր խմում, արևային լոգանք ընդունում գետերի, մերձմոսկովյան լճերի ափին, բայց ամեն դեպքում 32 աստիճան շոգը քչերին էր գոհացնում։
Կանխատեսում
Հայպետհիդրոմետ կենտրոնի ներկայացուցիչ Գագիկ Սուրենյանը չորեքշաբթի մամուլի ասուլիսի ընթացքում նշեց, որ Հայաստանում հունիս ամսվա ամենաշոգ օրը երեկ էր` հունիսի 30-ին։ Սնդիկի սյունը ցերեկը ցույց էր տալիս +38 աստիճան տաքություն։
Շիրակի, Կոտայքի և Գեղարքունիքի մարզերում ինչպես նաև Արագածոտնի մարզի լեռնային շրջաններում հուլիսին սպասվում են նորմայից ավել տեղումներ։ Օդի ջերմաստիճանը գիշերը կնվազի մինչև 5-8 աստիճան տաքություն, ամսվա երկրորդ կեսին ցերեկային ժամերին կլինի մինչև 30-33 աստիճան տաքություն։
Սյունիքի մարզում սպասվում են նորմայից պակաս տեղումներ, հուլիս ամիսը տեղումնառատ չի լինի։ Հուլիսի առաջին կեսին գիշերային ժամերին ջերմաստիճանը կնվազի մինչև 14-17 աստիճան, իսկ երկրորդ կեսին ցերեկը կբարձրանա մինչև 36-39 աստիճան։
Ինչ վերաբերում է Երևանին, ապա հուլիսին տեղումները կլինեն նորմայի սահմաններում։ Հուլիսի առաջին օրերին գիշերային ժամերին սնդիկի սյունը ցույց կտա 12-14 աստիճան, ցերեկային ժամերին` 37-39 աստիճան տաքություն։
Փրկվեք ինչպես կարող եք
Եթե դուք չեք ուզում դառնալ շոգ ամռան զոհը, օգտվեք հետևյալ խորհուրդներից.
— Ցերեկվա ժամերին փոցող դուրս մի եկեք, հատկապես ժամը 13:00-ից մինչև 16:00-ն, քանի որ արևի ուլտրամանուշակագույն ուղիղ ճառագայթները բացասական ազդեցություն են ունենում մարդկանց ինքնազգացողության վրա և տարբեր հիվանդություններ առաջացնում։
— Անհրաժեշտ է շատ հեղուկ օգտագործել, հատկապես` ջուր։ Ամառային շոգ օրերին ցանկալի է ոգելից խմիչք չօգտագործել։
— Հագուստը պետք է լինի բնական գործվածքից։ Կրեք փակ հագուստ։ Մի մոռացեք նաև գլխարկի մասին։
— Կերեք թարմ սնունդ։
— Շաքար պարունակող մթերքից խուսափեք, քանի որ ծարավի զգացողություն կառաջանա։
— Օդափոխեք սենյակը, միջանցիկ քամի ստեղծեք, բայց մի կանգնեք դրա տակ։
— Օդորակիչներից օգտվեք չափավոր։ Եթե անտանելի տապից հետո մտել եք օդորակիչով սենյակ, կարգավորեք ջերմաստիճանը. սենյակում ջերմաստիճանը նվազեցրեք աստիճանաբար։ Կարևոր է նաև, որ դրսում և ներսում օդի ջերմաստիճանի տարբերությունը 10 աստիճանից ավելի չլինի։
— Ձեզ մոտ ունեցեք հովհար, թեյ խմեք, հատկապես կանաչ թեյ, հաճախակի ցնցուղ ընդունեք։
