ԵՐԵՎԱՆ, 29 հունիսի — Sputnik. Գերմանիայի արտգործնախարար Վալտեր Շտայնմայերը Երևանում Հայաստանի ԱԳՆ ղեկավար Էդվարդ Նալբանդյանի հետ համատեղ ասուլիսի ժամանակ ասաց, որ Ռուսաստանի և Թուրքիայի հարաբերությունների բարելավումը ողջունելի է։
«Պետք է ողջունել, որ Ռուսաստանի և Թուրքիայի հարաբերությունները կարգավորվում են»,- ասաց Շտայնմայերը` մեկնաբանելով Sputnik Արմենիայի թղթակցի հարցը` Թուրքիայի նախագահ Թայիփ Էրդողանի`Վլադիմիր Պուտինին հղած նամակի մասին։
Ավելի վաղ Կրեմլի մամուլի ծառայությունը հայտնել էր, որ Ռուսաստանի նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը հեռախոսազրույցի ընթացքում քննարկել են ռուս զբոսաշրջիկների` Թուրքիա այցելելու վերաբերյալ սահմանափակումների վերացման հարցը։
Զրույցը կայացել է այն բանից հետո, երբ Էրդողանը ՌԴ նախագահին ուղղված նամակում ներողություն է խնդրել խոցված Սու-24 ինքնաթիռի համար, ցավակցություն հայտնել զոհված օդաչուի հարազատներին, ինչպես նաև հայտարարել, որ Թուրքիան չի ցանկացել փչացնել Ռուսաստանի հետ հարաբերությունները, քանի որ Մոսկվան Անկարայի ռազմավարական գործընկերն է։
Շտայնմայերի խոսքով` ժամանակակից աշխարհում կան բազմաթիվ հակամարտություններ, և պետք է ձգտել նվազեցնել լարվածությունը։
Նա նշեց, որ դա կարող է դրական ազդեցություն ունենալ սիրիական հակամարտության կարգավորման վրա։ Հայաստանի արտգործնախարար Էդվարդ Նալբանդյանն իր հերթին նշեց, որ երկու երկրի միջև գոյություն ունեցող հարցերը պետք է իրենք լուծեն, սակայն Թուրքիայի վարած քաղաքականությունը նոր խնդիրներ է առաջացրել։
«Վերջին տարիներին Թուրքիան, չլուծելով հին խնդիրները, անցյալի բարդ հարցերը, ստեղծել է նորերը և, հայտնվելով բարդ իրավիճակում, փորձում է ազատվել այդ խնդիրներից»,- ասաց Նալբանդյանը։
Թուրքիայի նախորդ վարչապետի հովանավորությամբ հարևանների հետ ստեղծված խնդիրները հանգեցրել են բավական խճճված և բարդ իրավիճակի։ «Այդ կծիկը քանդելու համար լրացուցիչ ջանքեր են պետք»,- նշեց Նալբանդյանը։
