ԵՐԵՎԱՆ, 29 հունիսի – Sputnik. Ստամբուլի Աթաթուրքի ավան միջազգային օդանավակայանում երեկ տեղի ունեցած ահաբեկչությունից հետո Թուրքիայում վախի մթնոլորտը պահպանվում է։ Այս մասին Sputnik Արմենիայի հետ զրույցում հայտնեց «Ակոս» թերթի հայկական էջի խմբագիր Բագրատ Էստուկյանը։
«Երեկ գիշերը Թուրքիա ժամանած որոշ զբոսաշրջիկներ, դեռ նույնիսկ օդանավակայանից դուրս չեկած, դարձյալ վերադարձան իրենց իսկ ինքնաթիռներով։ Որոշ մարդիկ էլ փակված էին մնացել իրենց ինքնաթիռներում, այսինքն` ինքնաթիռները վայրէջք էին կատարել, բայց ժողովուրդը դուրս չէր գալիս, նրանք շուրջ 2-3 ժամ մնացին ինքնաթիռում, քանի որ ինչ-որ անտանելի վախի զգացում, սպասում կար, բայց այդ դրությունը հետզհետե մեղմացավ»,- մեզ հետ զրույցում պատմեց Էստուկյանը։
Բագրատ Էստուկյանի փոխանցմամբ, օդանավակայանի աշխատանքն առավոտյան ժամը 08։00-ից հետո վերականգնվել է, օդանավակայանի տարածքն այժմ փակ չէ, բայց խստորեն վերահսկվում է։
«Հիվանդանոցների դիմաց մեծ թվով մարդիկ են հավաքվել, նրանք իրենց հարազատներին, ծանոթներին գտնելու համար անմիջապես հիվանդանոցներ էին շտապել, ոստիկանությունն էլ թույլ չէր տալիս ներս մտնել, որովհետև մյուս կողմից էլ անընդհատ շտապօգնության ավտոմեքենաներով նոր վիրավորներ էին տեղափոխում»,- ասաց նա։
Ահաբեկչությունից ժամեր անց Թուրքիայի վարչապետ Բինալի Յըլդըրիմը հայտարարել էր, որ նախնական տվյալներով կատարվածի հետևում կանգնած է «Իսլամական պետություն» ծայրահեղական ահաբեկչական խմբավորումը:
«Թուրքիայի իշխանություններն այնքան էլ չեն սիրում նմանօրինակ ահաբեկչություններն անմիջապես «Իսլամական պետությանը» վերագրել։ Նրանք ավելի շատ հակված են մեղադրել քրեական զինված միավորումներին։ Սակայն այս անգամ վարչապետը բավական վաղ հայտարարեց, որ թեև ամբողջովին վստահ չէ, բայց ամենայն հավանականությամբ կատարվածը «Իսլամական պետության» արարքն է»,- մեկնաբանելով Ստամբուլի օդանավակայանում տեղի ունեցած պայթյունները` ասաց Բագրատ Էստուկյանը։
Նշենք, որ համաշխարհային վերլուծաբանները նաև երկու այլ վարկած են շրջանառում` կապված ՌԴ-ի հետ Թուրքիայի հարաբերությունների կարգավորմանը խոչընդոտելու և Քրդական աշխատավորական կուսակցության զինված խմբերի հետ։ Բայց Բագրատ Էստուկյանի խոսքով` թուրքական իշխանությունն այս վարկածներին, չի անդրադառնում, շրջանառող հիմնական վարկած է շարունակում մնալ ԻՊ-ի տարբերակը։
«Մանավանդ, որ կան ականատեսներ, որոնք հայտնել են, որ ահաբեկիչները նախքան իրենց արարքը «Ալլահ ագբար» են գոչել։ Կա նաև այդ տեսագրությունը»,- ասաց Էստուկյանը։
Ինչ վերաբերում է զոհերին ու վիրավորներին, նրանց անուններն այս պահի դրությամբ դեռ չեն հրապարակվել։
