ԵՐԵՎԱՆ, 28 հունիսի — Sputnik. ԱԺ-ն առաջին ընթերցմամբ ընդունել է Հայաստանի ընտրական օրենսգրքում փոփոխություններ կատարելու մասին օրինագիծը, որով նախատեսվում է ընտրատեսամասերում տեսախցիկներ տեղադրել` ընտրությունների ուղիղ հեռարձակման համար։
Հեռարձակումն իրականացվելու է հատուկ նախատեսված կայքում։
Բացի այդ` նախատեսվում է նախապես իրականացնել ընտրողների էլեկտրոնային գրանցում` մատնահետքերով։ Հատուկ սարքի կողմից ընտրողի մատնահետքի և նույնականացման քարտի համապատասխանության հաստատումից հետո կտպվի քվեաթերթիկը։
Ենթադրվում է, որ մատնահետքերի որոշման համակարգի ներդրման համար անհրաժեշտ է 16 մլն եվրո, որից իշխանությունը պատրաստ է տրամադրել 3 մլն-ը։
Մնացած գումարը պետք է հատկացնեն դոնորները, այդ իսկ պատճառով համակարգի ներդրումը, կառավարության աշխատակազմի ղեկավար-նախարար Դավիթ Հարությունյանի խոսքով, պայմանական է, մինչև միջոցներ գտնելը։
Կառավարության կողմից ևս մեկ առաջարկ է հնչեցվել` կուսակցություններին ներկայացնել ընտրողների ցուցակները ընտրատարածքներից անկախ նրանից, թե ընտրատարածքում ներկայացված եղե՞լ է այդ կուսակցության վստահված անձը, թե՞ ոչ։
Այս փոփոխությունների մասին պայմանավորվածությունները ձեռք են բերվել իշխանության և ընդդիմության միջև փոխհամաձայնության գալու արդյունքում։
ԱԺ-ն մայիսի 25-ին երրորդ և վերջնական ընթերցմամբ հաստատել է երկրի նոր Ընտրական օրենսգիրքը։
