ԵՐԵՎԱՆ, 23 մայիսի — Sputnik. ՀՀ ընտրական նոր օրենսգրքով առաջարկվում է տեղամասային ընտրական հանձնաժողովի ընդունած որոշումների, գործողությունների կամ անգործության, քվեարկության արդյունքներն անվավեր ճանաչելու դիմումները ներկայացնել քվեարկության հաջորդ օրը` 12։00-ից մինչև 18։00-ն։ Այլ տարբերակ էլ կա` քվեարկության երկրորդ օրը` ժամը 09։00-ից մինչև 11։00-ն։
«Փաթեթի հաջորդ նախագծով առաջարկվում է Ազգային ժողովի ընտրությունների ժամանակ թույլ տալ բոլոր ընտրական տեղամասերից քվեարկության ընթացքի և քվեարկության արդյունքների ամփոփման գործընթացի տեսանկարահանում և համացանցային հեռարձակում իրականացնել առցանց ռեժիմում` հատուկ ստեղծված կայքերի միջոցով։ Տեսանկարահանումը պետք է իրականացվի մասնագիտացված կազմակերպության կողմից»,- ասաց Արթուր Սարգսյանը։
Նա առաջարկեց նաև ներդնել ընտրողների մատնահետքերով նախնական էլեկտրոնային գրանցման համակարգը։ Նույնականացման քարտ չունեցող և նույնականացման քարտ ստանալու համար չգրանցված քաղաքացիներն ընտրողների ցուցակում չեն ընդգրկվում։ Պետք է ընդգծել, որ նույնականացման քարտ ստանալու համար գրանցված է համարվում այն քաղաքացին, ով, օրինակ, մատնահետքեր է հանձնել։ Իսկ այն անձը, որը չի գրանցվել նույնականացման քարտ ստանալու համար, ապա նա կարող է մասնակցել ընտրություններին` ընդգրկվելով ընտրողների լրացուցիչ ցուցակում։
«Քվեարկության օրը ընտրողների գրանցումը կատարվում է տեխնիկական սարքի միջոցով` մատնահետքերով։ Ընտրողը դուրս է հրավիրվում քվեարկության սենյակից, եթե տեխնիկական սարքավորումը պարզում է, որ անձն արդեն մասնակցել է քվեարկությանը։ Այդ ժամանակ էկրանին հայտնվում է կարմիր նշան և մասնագետը տեղեկացնում է հանձնաժողովի նախագահին»,-ասաց Սարգսյանը։
Նա մի կարևոր կետ ևս նշեց. տեխնիկական սարքավորման տպած տեղեկանքը պետք է պարունակի հատուկ նշում այն ընտրողների վերաբերյալ, որոնց գրանցումն իրականացվել է անձը հաստատող փաստաթղթի հիման վրա։
