ԵՐԵՎԱՆ, 28 հունիսի — Sputnik. Լաուրա Սարգսյան. «Ժիզել» բալետը Երևանում նորից բեմադրվեց անցյալ տարի` Ալ. Սպենդիարյանի անվան Օպերայի և բալետի ազգային ակադեմիական թատրոնի գլխավոր բալետմեյստեր Վիլեն Գալստյանի կողմից։
«Ես չեմ փոխել «Ժիզելը», պարզապես ներկայացրեցի այնպես, ինչպես այն պետք է լինի։ Իսկ առաջին «Ժիզելը» Երևանում բեմադրել է Մարկ Մնացականյանը, ով իմ հիանալի ընկերն էր»,- Sputnik Արմենիայի հետ զրույցում ասաց Գալստյանը։
Բացի «Ժիզելից»` Մնացականյանը ևս մի քանի բեմադրության հեղինակ է, այդ թվում` իսպանական «Լորկիանա» բալետի։
«Ժիզելն» այն բալետներից է, որոնք դասական են, և յուրաքանչյուր մարդ կյանում գոնե մեկ անգամ պետք է այն դիտի։ Ադոլֆ Ադանի երկու գործողությամբ բալետի առաջնախաղը տեղի է ունեցել այս օրը երկու դար առաջ` հեռավոր 1841 թվականին Փարիզի Գրանդ Օպերայի բեմում։ «Ժիզելի» լիբրետոն գրել է ֆրանսիացի բանաստեղծ Թեոֆիլ Գոթիեն`գերմանացի բանաստեղծ Հայնրիխ Հայնեի գրառած հին լեգենդի մոտիվներով։ Լեգենդը պատմում էր հարսանիքից առաջ մահացած աղջիկների մասին, որոնք վրեժ էին լուծում ճանապարհորդներից` նրանց մահվան հասցնելով խելահեղ պարերով։ Սյուժեի հիմքում ընկած է հենց այս լեգենդը։
Երևանի հանդիսատեսի համար «Ժիզելը» Օպերայի և բալետի թատրոնի խաղացանկում ներառված միակ բալետը չէ։ Նախապատրաստվում է Արամ Խաչատրյանի ևս մեկ բալետի` «Դիմակահանդեսի» բեմադրությունը։
Ինչպես հայտնեց բալետմեյստեր Գալստյանը, վերջերս ավարտվեցին բալետի առաջին գործողության բեմադրությունն ու փորձերը։ Ժամանակին Երևանի օպերային թատրոնը բամադրությունների քանակով Խորհրդային Միությունում երրորդ տեղն էր զբաղեցնում։ Ու թեև այսօր Օպերայի և բալետի թատրոնը զիջում է համաշխարհային թատրոններին մի շարք չափանիշներով, այնուամենայնիվ Երևանի հանդիսատեսն անհամբեր սպասում է յուրաքանչյուր նոր բեմադրության։
