ԵՐԵՎԱՆ, 27 հունիսի-Sputnik. Հայաստանի պետավտոտեսուչներին շուտով կհանձնվեն անհատական տեսաձայնագրող խցիկներ, որոնք կնկարահանեն վարորդների հետ շփումը ծառայողական ավտոմեքենայից դուրս:
Հունիսի 23-ին Հայաստանի ոստիկանության կայքում տեղեկատվություն է հայտնվել այն մասին, որ հերթական հակակոռուպցիոն ծրագրերի իրագործման շրջանակում շահագործման կդրվեն նորարարական տեսախցիկներ, որոնք անպայման կարգով կկրեն ՃՈ բոլոր աշխատակիցները: Այս դիմացկուն, անջրանցիկ տեսախցիկները կարող են նկարահանել 180 աստիճան անկյան տակ, — 50-ից մինչև +55 աստիճան ջերմության պայմաններում:
ՃՈ աշխատակիցների համազգեստներին ամրացվող տեսախցիկները պետք է նկարահանեն «քաղաքացիների հետ ոստիկանների շփման գործընթացը»:
Տեսուչը պետք է միացնի տեսախցիկը և չանջատի այն մինչև աշխատանքային օրվա վերջը: Տեսախցիկն աշխատում է բացառապես ծառայության ժամանակ: Սարքը պետք է կատարի բոլոր իրադարձությունների տեսանկարահանումը, որոնց հետ պետավտոտեսուչը բախվում է ծառայության ընթացքում: Տեսագրությունը պահվում է երեք օր, որից հետո սարքը նոր կադրեր է տեսագրում:
Եթե վարորդը որոշել է կոնկրետ ՃՏՊ-ից հետո ստանալ տեսագրությունը, ապա պետք է նույն օրը կամ հաջորդ օրը դիմի ոստիկանություն, որպեսզի նրան տրամադրեն այն:
Սակայն հայ վարորդներն արդեն ահազանգում են, որ այդ կերպ խախտվում են իրենց իրավունքները, և կարող են խնդիրներ լինել անձնական կյանքի գաղտնիության հետ:
«Աքիլես» վարորդների իրավունքների պաշտպանության կազմակերպության նախագահ Էդուարդ Հովհաննիսյանը երկուշաբթի հայտնեց լրագրողներին, որ դեռ անցյալ տարվա փետրվարին հայտարարվել է այն մասին, որ ՃՈ աշխատակիցների համազգեստների վրա կամրացվեն տեսախցիկներ, բայց ինչ-ինչ պատճառներով դա տեղի չի ունեցել:
«Ինչքան գիտեմ, նորամուծությունը պետք է ուժի մեջ մտնի այս ամսվա ընթացքում: Այդ տեսախցիկները նկարելու են մեքենան ոչ միայն դրսից, այլև ներսից: Բայց դա արդեն իմ անձնական գոտին է: Եթե ես տեղափոխում եմ այս կամ այն քաղաքացուն, դա իմ անձնական իրավունքն է»,- ասաց Հովհաննիսյանը:
Նրա խոսքով՝ վարորդներին դուր չի գալիս այն, որ տեսագրությունը կպահվի տեսախցիկի հիշողությունում երեք օր, նրանք առաջարկում են ավելացնել ժամկետը մինչև հինգ օր:
«Եթե, օրինակ, ես նամակ գրեմ, ապա այն միայն երեք օրում կհասնի հասցեատիրոջը, և այն ընթացքում տեսագրությունը կարող է ջնջվել: Ուստի ավելի լավ է հնարավորություններ ստեղծել տեսագրությունը հինգ օր պահելու համար, քանի որ կարևոր է, որպեսզի պահպանվի տեսուչի և վարորդի խոսակցության ձայնագրությունը»,- ասաց Հովհաննիսյանը:
Բացի այդ նա նշեց, որ վարորդը նույնպես պետք է իրավունք ունենա ձայնագրել տեսուչի հետ խոսակցությունը:
