ԵՐԵՎԱՆ, 24 հունիսի — Sputnik. Oգոստոսի 1-ից ՀՀ շարքային սպառողներն էլեկտրաէներգիայի դիմաց կվճարեն 2,58 դրամով ավելի պակաս։ Այսօր նման որոշում կայացրեց Հանրային ծառայությունները կարգավորող հանձնաժողովը։
ՀԾԿՀ-ն որոշեց բնակչության համար 1 ԿՎտ/ժ էլեկտրաէներգիայի ցերեկային սակագինը 48,78 դրամից իջեցնել 46,20-ի, գիշերային սակագինը՝ 38,78 դրամից՝ 36.20 դրամի:
Հիշեցնենք, որ անցյալ տարի օգոստոսի 1-ին ՀԾԿՀ-ի որոշմամբ 1 ԿՎ/Ժ էլեկտրաէներգիայի սակագինը թանկացել էր 7 դրամով։ Եվ, փաստորեն, նոր` էժան սակագնով էլեկտրաէներգիայի գինը չի վերադառնում նախկին մակարդակին։
Ավելին` 7 դրամով թանկացման արդյունքում և հասարակության զանգվածային բողոքների ճնշման տակ անցյալ տարի կառավարությունն ու ՀԷՑ-ի նոր սեփականատերը համաձայնության եկան սուբսիդավորել մինչև 500 կՎտ/ժ սպառում ունեցող բաժանորդների ավելացած ծախսերը։ Այսինքն` այս բաժանորդների համար անցնող տարվա ընթացքում էլեկտրաէներգիայի սակագինը շարունակեց մնալ նախկինը` ցերեկը`31.85, գիշերը`41.85 դրամ։ Իսկ այժմ ըստ էության շուրջ 5 դրամով թանկանալու է։
Կշարունակի՞ արդյոք ՀԷՑ-ը սուբսիդավորել այս սպառողների ծախսերը, թե՞ ոչ, հանձնաժողովի նիստին ներկա ընկերության տնօրեն Կարեն Հարությունյանն այսօր հրաժարվեց պատասխանել` պատճառաբանելով, որ դա իր իրավասությունից դուրս է։
