ԵՐԵՎԱՆ, 17 հունիսի-Sputnik. Գազի սակագնի իջեցման որոշումից 2 շաբաթ անց Հանրային ծառայությունները կարգավորող հանձնաժողովը սկսեց քննարկել էլեկտրաէներգիայի սակագինը 2.58 դրամով իջեցնելու հարցը։ Հիմնական հիմնավորումն այն է, որ գազի սակագինն իջել է, իսկ ՀԷՑ-ի ֆինանսական վիճակը` բարելավվել։ Հայ տնտեսագետները քննարկում են ՀԾԿՀ-ի առաջարկը։
«Ձեզ հիշեցնեմ, որ նախորդ տարի 15 տոկոսով սակագինը բարձրացվեց։ Բուռն քննարկումների ժամանակ ասացին, որ ՀԷՑ-ում լուրջ ֆինանսական խնդիրներ կան, ֆինանսական ճեղքվածքը պետք է փակել սակագնի բարձրացմամբ։ Այնինչ ՀԷՑ-ի կուտակած պարտքի պատճառը մենք` սպառողներս չէինք։ Հիմա մեզ փորձում են վերադարձնել հին դիրքեր, բայց ընդամենը 5 տոկոսով։ Երբ նայում ենք սակագնի ձևավորման մեթոդիկան, այն որևէ կապ չունի շուկայական տնտեսության պայմանների հետ»,-ասաց տնտեսագետ Վահագն Խաչատրյանը։
ՀՊՏՀ տնտեսության կարգավորման և միջազգային տնտեսական հարաբերությունների ֆակուլտետի դեկան Ատոմ Մարգարյանն էլ կարծում է, որ նման չափով էլեկտրաէնեգրիայի սակագնի իջեցումը էական ազդեցություն չի թողնի սպառողի ու տնտեսվարողների վրա։ Նրա խոսքով` հնարավոր է մի փոքր ավելի իջեցնել։
«Այսպիսի սակագներով տնտեսվարելով` մեր արտադրողները, հատկապես հենքային, արդյունաբերական մրցունակ պրոդուկտներ արտադրողները մրցունակ չեն լինի»,-ասաց տնտեսագետը։
Մարգարյանի համոզմամբ` նկատի ունենալով առաջիկա քաղաքական զարգացումները` սուբսիդավորման ծավալների տարրերը կպահպանվեն։ Նա հավանական է համարում մի պատճառ, որն ընկած է սակագնի ոչ էական նվազեցման հիմքում։
«Հայաստանը ռեսուրս չունի ատոմակայանին երկրորդ շնչառություն տալու համար, դա միայն վարկային ռեսուրսներ ձեռք բերելու ճանապարհով կարող է լինել։ Ինձ որքան հայտնի է, արևմտյան կառույցներն այնքան էլ պատրասակամ չեն այս հարցում, մեզ մնում է ստրատեգիական գործընկերոջ` Ռուսաստանի աջակցությունը։ Հավանաբար այս գործոնը դեր է խաղացել, որ էլեկտրաէներգիայի սակագնի իջեցումը լինի փոքր չափով»,-ասաց Ատոմ Մարգարյանը։
Էլեկտրաէներգիայի սակագնի նվազումը կգործի օգոստոսից, նոր սակագները կյանք կստանան շուրջ մեկ տարով։ Մինչ այդ բնակիչ-բաժանորդները կօգտվեն նախորդ տարի սահմանված սուբսիդավորման կարգից։ Ըստ այդմ` սուբսիդավորումը տրամադրվում է ամսական մինչև 250 կՎտ էլեկտրաէներգիա օգտագործող բնակիչ-բաժանորդներին և մինչև 500 կՎտ էլեկտրաէներգիա օգտագործող ՓՄՁ-ներին` 250 կՎտ-ի դիմաց։
Այս պահին տնային տնտեսությունների համար էլեկտրաէներգիայի սակագինը 1 կՎտժ-ի համար կկազմում է 48.78 դրամ, գիշերային սակագինը` 38.78 դրամ
Նշենք, որ մինչև ՀԾԿՀ-ում էլեկտրաէներգիայի գինն իջեցնելու մասին որոշման ընդունումը հարցը կքննարկվի հասարակական կազմակերպությունների հետ։
