ԵՐԵՎԱՆ, 18 հունիսի — Sputnik. Սանկտ Պետերբուրգում ընթացող միջազգային տնտեսական համաժողովում, որն ընդունված է կոչել «Ռուսական Դավոս», բոլոր երկրները պետք է փորձեն օգտվել պոտենցիալ նոր ներդրողների հետ տնտեսական կապեր հաստատելու և ԵՏՄ-ի մեծ շուկայի հնարավորությունները ներկայացնելու հարմար առիթից: Ներկայացնելով համաժողովի նպատակը` Sputnik Արմենիայի թղթակցին ասաց Եվրասիական տնտեսական հանձնաժողովի (ԵՏՀ) կոլեգիայի նախագահ Տիգրան Սարգսյանը:
Նրա խոսքով` համաժողովը նաև նոր շուկաներ գտնելու հնարավորություն է խոշոր ներդրողների համար, «որպեսզի հետագայում այս մեծ շուկայում կարողանան իրացնել իրենց ծառայություններն ու ապրանքները»:
Sputnik Արմենիայի հարցին, թե ինչով է արտահայտվում մեր երկրի դերը ԵՏՄ շուկայում, Տիգրան Սարգսյանը պատասխանեց, որ արագ փոփոխվող աշխարհում օրեցօր նոր հնարավորություններ են բացվում, ուստի Հայաստանը պետք է պատրաստ լինի աշխատել այս մեծ շուկայում:
Հարցին, թե ԵՏՄ շուկայում Թուրքիայի դիրքերը զիջելուց հետո արդյո՞ք հաջողվեց Հայաստանին գրավել այդ դիրքը, ինչպես որ ակնկալվում էր, Տիգրան Սարգսյանը նշեց, որ Հայաստանում հատկապես արագ տեմպերով է զարգանում գյուղատնտեսությունը, «այն պարզ պատճառով, որ արտադրողները տեսնում են, որ այս շուկայում ունեն պահանջարկ, այս շուկայում իրացվում են»:
«Մենք ունենք մրցակցային առավելություններ այս շուկայում, որից պետք է օգտվենք»,- ասաց նա` ուրախությամբ նշելով, որ ԵՏՄ շուկայում բավական արագ հայտնվում են հատկապես հայկական գյուղատնտեսական ապրանքները:
Միջազգային տնտեսական համաժողովը մեկնարկել է հունիսի 16-ին։ Համաժողովն անցկացվում է ամեն տարի` սկսած 1997 թվականից։ Այս տարի այն անցկացվում է «Տնտեսական նոր իրականության շեմին» կարգախոսով։
