ԵՐԵՎԱՆ, 16 հունիսի — Sputnik. ՌԴ-ում Բելառուսի դեսպան Իգոր Պետրիշենկոն Սանկտ Պետերբուրգում մեկնարկած ամենամյա միջազգային տնտեսական համաժողովի` ԵՏՄ զարգացմանը նվիրված նիստի ժամանակ հիշեցրեց, որ համաձայն ռուսական հայտնի խոսքի` ընդունված է խելք խելքի տալ երեքով, բայց ԵՏՄ-ի դեպքում կառույցը հակառակ գնաց այդ կարգին և ընդլայնեց իր կազմը ևս երկու երկրով ու հիմա ստիպված է «խելք խելքի տալ հինգով»:
Իր ելույթը հումորով սկսեց նաև «Ճանաչում ենք Եվրասիան» ասոցիացիայի նախագահ Անտոնիո Ֆելլիկոն:
«Ինչու՞ է արագիլը կանգնում մեկ ոտքի վրա, որովհետև կընկնի, եթե բարձրացնի երկրորդ ոտքը»,- բանախոսը ԵՏՄ անդամ երկրներին այս համեմատությամբ կոչ արեց տնտեսական կայունության ու ապահովության համար կանգնել երկու ոտքի վրա, այսինքն`տնտեսական առանձին միություն կազմելով` չհրաժարվել այլ կառույցների հետ համագործակցությունից:
Անդրադառնալով միասնական արժույթի, մասնավորապես` ԵՏՄ տարածքում ռուսական ռուբլուն անցնելու գաղափարին, բանախոսն ընդգծեց, որ մինչ օրս այս հարցն անպատասխան է մնում:
«Առայժմ գործը սահմանափակվում է ընդհանուր բնույթի դատողություններով, և չկա հստակ պատասխան` այո, թե ոչ»,- նշեց Անտոնիո Ֆելլիկոն` ավելացնելով, որ միասնական արժույթը կարող է խթանել ԵՏՄ–ի ներքին առևտուրը` շուրջ 50%-ով։
Բանախոսն իր այդ տեսակետը հիմնավորեց ԵՄ-ի` եվրագոտում միասնական արժույթի շնորհիվ ներքին առևտրաշրջանառության ծավալների ավելացման փորձով:
Ի հավելումն Տիգրան Սարգսյանը հիշեցրեց, որ մայիսին Սինգապուրի վարչապետի հետ ստորագրված հուշագրով մեկնարկել են այդ երկրի հետ ազատ առևտրի շուրջ բանակցությունները:
«Այդ բանակցությունների ընթացքում Սինգապուրի վարչապետն առաջարկեց հնարավորինս արագ քննարկել Սինգապուրի հետ ազատ առևտրի համաձայնագրի ստորագրման հնարավորությունը: Եվ Սինգապուրը հետաքրքրված է դրանում: Ես ուրախ եմ հայտնել, որ մեր երկրների վարչապետները քննարկել են այդ հարցը և դրական արձագանքել առաջարկին: Այնպես որ մենք քայլ առ քայլ կառուցում ենք այդ միասնական տարածքը»,- ասաց Տիգրան Սարգսյանը:
Ի դեպ, Սինգապուրից բացի, Տիգրան Սարգսյանի խոսքով` ևս 30 երկիր, որոնց թվում` Չինաստանը, շահագրգռված են ԵՏՄ-ի հետ տնտեսական համագործակցությամբ:
Իսկ ինչ վերաբերում է ԵՄ-ի հետ հարաբերություններին, Տիգրան Սարգսյանը հայտարարեց, որ ԵՏՄ-ն իր հերթին շահագրգռված է ԵՄ-ի հետ համագործակցությամբ:
ԵՄ-ի փորձը ցույց է տալիս, որ եվրոյին անցում կատարելը մեծացրեց ներքին առևտրի շրջանառությունը, սակայն բանախոսը կասկած հայտնեց այն մասին, թե որքանով կկարողանա այս խնդիրը հաղթահարել ԵՏՄ-ն` միասնական արժույթի անցնելու դեպքում:
